3.60 δὸς δʹ ἔτι Τηλέμαχον καὶ ἐμὲ πρήξαντα νέεσθαι ,
3.61 οὕνεκα δεῦρʹ ἱκόμεσθα θοῇ σὺν νηὶ μελαίνῃ .
3.62 ὣς ἄρʹ ἔπειτʹ ἠρᾶτο καὶ αὐτὴ πάντα τελεύτα .
3.63 δῶκε δὲ Τηλεμάχῳ καλὸν δέπας ἀμφικύπελλον ·
3.64 ὣς δʹ αὔτως ἠρᾶτο Ὀδυσσῆος φίλος υἱός .
3.65 οἱ δʹ ἐπεί ὤπτησαν κρέʹ ὑπέρτερα καὶ ἐρύσαντο ,
3.66 μοίρας δασσάμενοι δαίνυντʹ ἐρικυδέα δαῖτα .
3.67 αὐτὰρ ἐπεὶ πόσιος καὶ ἐδητύος ἐξ ἔρον ἕντο ,
3.68 τοῖς ἄρα μύθων ἦρχε Γερήνιος ἱππότα Νέστωρ ·
3.69 νῦν δὴ κάλλίον ἐστι μεταλλῆσαι καὶ ἐρέσθαι
3.70 ξείνους , οἱ τινές εἰσιν , ἐπεὶ τάρπησαν ἐδωδῆς .
3.71 ὦ ξεῖνοι , τίνες ἐστέ ; πόθεν πλεῖθʹ ὑγρὰ κέλευθα ;
3.72 ἤ τι κατά πρῆξιν ἦ μαψιδίως ἀλάλησθε
3.73 οἷά τε ληιστῆρες ὑπεὶρ ἅλα , τοί τʹ ἀλόωνται
3.74 ψυχὰς παρθέμενοι κακὸν ἀλλοδαποῖσι πέροντες ;
3.75 τὸν δʹ αὖ Τηλέμαχος πεπνυμένος ἀντίον ηὔδα
3.76 θαρσήσας · αὐτὴ γὰρ ἐνὶ φρεσὶ θάρσος Ἀθήνη
3.77 θῆχʹ , ἵνα μιν περὶ πατρὸς ἀποιχομένοιο ἔροιτο
3.78 ἠδʹ ἵνα μιν κλέος ἐσθλὸν ἐν ἀνθρώποισιν ἔχῃσιν ·
3.79 ὦ Νέστορ Νηληϊάδη , μέγα κῦδος Ἀχαιῶν ,
3.80 εἴρεαι ὁππόθεν εἰμέν · ἐγὼ δέ κέ τοι καταλέξω .
3.81 ἡμεῖς ἐξ Ἰθάκης ὑπονηίου εἰλήλουθμεν ·
3.82 πρῆξις δʹ ἥδʹ ἰδίη , οὐ δήμιος , ἣν ἀγορεύω .
3.83 πατρὸς ἐμοῦ κλέος εὐρὺ μετέρχομαι , ἤν που ἀκούσω ,
3.84 δίου Ὀδυσσῆος ταλασίφρονος , ὅν ποτέ φασι
3.85 σὺν σοὶ μαρνάμενον Τρώων πόλιν ἐξαλαπάξαι .
3.86 ἄλλους μὲν γὰρ πάντας , ὅσοι Τρωσὶν πολέμιξον ,
3.87 πευθόμεθʹ , ἧχι ἕκαστος ἀπώλετο λυγρῷ ὀλέθρῳ ,
3.88 κείνου δʹ αὖ καὶ ὄλεθρον ἀπευθέα θῆκε Κρονίων .
3.89 οὐ γάρ τις δύναται σάφα εἰπέμεν ὁππόθʹ ὄλωλεν ,