Greek Reader — The Homeric Odyssey (1.382

1.382 Τηλέμαχον θαύμαζον , ὃ θαρσαλέως ἀγόρευεν .

1.383 τὸν δʹ αὖτʹ Ἀντίνοος προσέφη , Εὐπείθεος υἱός ·

1.384 Τηλέμαχʹ , ἦ μάλα δή σε διδάσκουσιν θεοὶ αὐτοὶ

1.385 ὑψαγόρην τʹ ἔμεναι καὶ θαρσαλέως ἀγορεύειν ·

1.386 μὴ σέ γʹ ἐν ἀμφιάλῳ Ἰθάκῃ βασιλῆα Κρονίων

1.387 ποιήσειεν , ὅ τοι γενεῇ πατρώιόν ἐστιν .

1.388 τὸν δʹ αὖ Τηλέμαχος πεπνυμένος ἀντίον ηὔδα ·

1.389 Ἀντίνοʹ , ἦ καί μοι νεμεσήσεαι ὅττι κεν εἴπω ;

1.390 καί κεν τοῦτʹ ἐθέλοιμι Διός γε διδόντος ἀρέσθαι .

1.391 ἦ φῂς τοῦτο κάκιστον ἐν ἀνθρώποισι τετύχθαι ;

1.392 οὐ μὲν γάρ τι κακὸν βασιλευέμεν · αἶψά τέ οἱ δῶ

1.393 ἀφνειὸν πέλεται καὶ τιμηέστερος αὐτός .

1.394 ἀλλʹ ἦ τοι βασιλῆες Ἀχαιῶν εἰσὶ καὶ ἄλλοι

1.395 πολλοὶ ἐν ἀμφιάλῳ Ἰθάκῃ , νέοι ἠδὲ παλαιοί ,

1.396 τῶν κέν τις τόδʹ ἔχῃσιν , ἐπεὶ θάνε δῖος Ὀδυσσεύς ·

1.397 αὐτὰρ ἐγὼν οἴκοιο ἄναξ ἔσομʹ ἡμετέροιο

1.398 καὶ δμώων , οὕς μοι ληίσσατο δῖος Ὀδυσσεύς .

1.399 τὸν δʹ αὖτʹ Εὐρύμαχος Πολύβου πάϊς ἀντίον ηὔδα ·

1.400 Τηλέμαχʹ , ἦ τοι ταῦτα θεῶν ἐν γούνασι κεῖται ,

1.401 ὅς τις ἐν ἀμφιάλῳ Ἰθάκῃ βασιλεύσει Ἀχαιῶν ·

1.402 κτήματα δʹ αὐτὸς ἔχοις καὶ δώμασιν οἷσιν ἀνάσσοις .

1.403 μὴ γὰρ ὅ γʹ ἔλθοι ἀνὴρ ὅς τίς σʹ ἀέκοντα βίηφιν

1.404 κτήματʹ ἀπορραίσει , Ἰθάκης ἔτι ναιετοώσης .

1.405 ἀλλʹ ἐθέλω σε , φέριστε , περὶ ξείνοιο ἐρέσθαι ,

1.406 ὁππόθεν οὗτος ἀνήρ , ποίης δʹ ἐξ εὔχεται εἶναι

1.407 γαίης , ποῦ δέ νύ οἱ γενεὴ καὶ πατρὶς ἄρουρα .

1.408 ἠέ τινʹ ἀγγελίην πατρὸς φέρει ἐρχομένοιο ,

1.409 ἦ ἑὸν αὐτοῦ χρεῖος ἐελδόμενος τόδʹ ἱκάνει ;

1.410 οἷον ἀναΐξας ἄφαρ οἴχεται , οὐδʹ ὑπέμεινε