Greek Reader — The Homeric Odyssey (1.351

1.351 τὴν γὰρ ἀοιδὴν μᾶλλον ἐπικλείουσʹ ἄνθρωποι ,

1.352 ἥ τις ἀκουόντεσσι νεωτάτη ἀμφιπέληται .

1.353 σοὶ δʹ ἐπιτολμάτω κραδίη καὶ θυμὸς ἀκούειν ·

1.354 οὐ γὰρ Ὀδυσσεὺς οἶος ἀπώλεσε νόστιμον ἦμαρ

1.355 ἐν Τροίῃ , πολλοὶ δὲ καὶ ἄλλοι φῶτες ὄλοντο .

1.356 ἀλλʹ εἰς οἶκον ἰοῦσα τὰ σʹ αὐτῆς ἔργα κόμιζε ,

1.357 ἱστόν τʹ ἠλακάτην τε , καὶ ἀμφιπόλοισι κέλευε

1.358 ἔργον ἐποίχεσθαι · μῦθος δʹ ἄνδρεσσι μελήσει

1.359 πᾶσι , μάλιστα δʹ ἐμοί · τοῦ γὰρ κράτος ἔστʹ ἐνὶ οἴκῳ .

1.360 ἡ μὲν θαμβήσασα πάλιν οἶκόνδε βεβήκει ·

1.361 παιδὸς γὰρ μῦθον πεπνυμένον ἔνθετο θυμῷ .

1.362 ἐς δʹ ὑπερῷʹ ἀναβᾶσα σὺν ἀμφιπόλοισι γυναιξὶ

1.363 κλαῖεν ἔπειτʹ Ὀδυσῆα φίλον πόσιν , ὄφρα οἱ ὕπνον

1.364 ἡδὺν ἐπὶ βλεφάροισι βάλε γλαυκῶπις Ἀθήνη .

1.365 μνηστῆρες δʹ ὁμάδησαν ἀνὰ μέγαρα σκιόεντα ,

1.366 πάντες δʹ ἠρήσαντο παραὶ λεχέεσσι κλιθῆναι .

1.367 τοῖσι δὲ Τηλέμαχος πεπνυμένος ἤρχετο μύθων ·

1.368 μητρὸς ἐμῆς μνηστῆρες ὑπέρβιον ὕβριν ἔχοντες ,

1.369 νῦν μὲν δαινύμενοι τερπώμεθα , μηδὲ βοητὺς

1.370 ἔστω , ἐπεὶ τόδε καλὸν ἀκουέμεν ἐστὶν ἀοιδοῦ

1.371 τοιοῦδʹ οἷος ὅδʹ ἐστί , θεοῖς ἐναλίγκιος αὐδήν .

1.372 ἠῶθεν δʹ ἀγορήνδε καθεζώμεσθα κιόντες

1.373 πάντες , ἵνʹ ὕμιν μῦθον ἀπηλεγέως ἀποείπω ,

1.374 ἐξιέναι μεγάρων · ἄλλας δʹ ἀλεγύνετε δαῖτας ,

1.375 ὑμὰ κτήματʹ ἔδοντες , ἀμειβόμενοι κατὰ οἴκους .

1.376 εἰ δʹ ὕμιν δοκέει τόδε λωίτερον καὶ ἄμεινον

1.377 ἔμμεναι , ἀνδρὸς ἑνὸς βίοτον νήποινον ὀλέσθαι ,

1.378 κείρετʹ · ἐγὼ δὲ θεοὺς ἐπιβώσομαι αἰὲν ἐόντας ,

1.379 αἴ κέ ποθι Ζεὺς δῷσι παλίντιτα ἔργα γενέσθαι ·

1.380 νήποινοί κεν ἔπειτα δόμων ἔντοσθεν ὄλοισθε .

1.381 ὣς ἔφαθʹ , οἱ δʹ ἄρα πάντες ὀδὰξ ἐν χείλεσι φύντες