Greek Reader — The Homeric Odyssey (1.322

1.322 μᾶλλον ἔτʹ ἢ τὸ πάροιθεν . ὁ δὲ φρεσὶν ᾗσι νοήσας

1.323 θάμβησεν κατὰ θυμόν · ὀίσατο γὰρ θεὸν εἶναι .

1.324 αὐτίκα δὲ μνηστῆρας ἐπῴχετο ἰσόθεος φώς .

1.325 τοῖσι δʹ ἀοιδὸς ἄειδε περικλυτός , οἱ δὲ σιωπῇ

1.326 ἥατʹ ἀκούοντες · ὁ δʹ Ἀχαιῶν νόστον ἄειδε

1.327 λυγρόν , ὃν ἐκ Τροίης ἐπετείλατο Παλλὰς Ἀθήνη .

1.328 τοῦ δʹ ὑπερωιόθεν φρεσὶ σύνθετο θέσπιν ἀοιδὴν

1.329 κούρη Ἰκαρίοιο , περίφρων Πηνελόπεια ·

1.330 κλίμακα δʹ ὑψηλὴν κατεβήσετο οἷο δόμοιο ,

1.331 οὐκ οἴη , ἅμα τῇ γε καὶ ἀμφίπολοι δύʹ ἕποντο .

1.332 ἡ δʹ ὅτε δὴ μνηστῆρας ἀφίκετο δῖα γυναικῶν ,

1.333 στῆ ῥα παρὰ σταθμὸν τέγεος πύκα ποιητοῖο ,

1.334 ἄντα παρειάων σχομένη λιπαρὰ κρήδεμνα ·

1.335 ἀμφίπολος δʹ ἄρα οἱ κεδνὴ ἑκάτερθε παρέστη .

1.336 δακρύσασα δʹ ἔπειτα προσηύδα θεῖον ἀοιδόν ·

1.337 Φήμιε , πολλὰ γὰρ ἄλλα βροτῶν θελκτήρια οἶδας ,

1.338 ἔργʹ ἀνδρῶν τε θεῶν τε , τά τε κλείουσιν ἀοιδοί ·

1.339 τῶν ἕν γέ σφιν ἄειδε παρήμενος , οἱ δὲ σιωπῇ

1.340 οἶνον πινόντων · ταύτης δʹ ἀποπαύεʹ ἀοιδῆς

1.341 λυγρῆς , ἥ τέ μοι αἰεὶ ἐνὶ στήθεσσι φίλον κῆρ

1.342 τείρει , ἐπεί με μάλιστα καθίκετο πένθος ἄλαστον .

1.343 τοίην γὰρ κεφαλὴν ποθέω μεμνημένη αἰεί ,

1.344 ἀνδρός , τοῦ κλέος εὐρὺ καθʹ Ἑλλάδα καὶ μέσον Ἄργος .

1.345 τὴν δʹ αὖ Τηλέμαχος πεπνυμένος ἀντίον ηὔδα ·

1.346 μῆτερ ἐμή , τί τʹ ἄρα φθονέεις ἐρίηρον ἀοιδὸν

1.347 τέρπειν ὅππῃ οἱ νόος ὄρνυται ; οὔ νύ τʹ ἀοιδοὶ

1.348 αἴτιοι , ἀλλά ποθι Ζεὺς αἴτιος , ὅς τε δίδωσιν

1.349 ἀνδράσιν ἀλφηστῇσιν , ὅπως ἐθέλῃσιν , ἑκάστῳ .

1.350 τούτῳ δʹ οὐ νέμεσις Δαναῶν κακὸν οἶτον ἀείδειν ·