Greek Reader — The Homeric Odyssey (1.237

1.237 εἰ μετὰ οἷς ἑτάροισι δάμη Τρώων ἐνὶ δήμῳ ,

1.238 ἠὲ φίλων ἐν χερσίν , ἐπεὶ πόλεμον τολύπευσεν .

1.239 τῷ κέν οἱ τύμβον μὲν ἐποίησαν Παναχαιοί ,

1.240 ἠδέ κε καὶ ᾧ παιδὶ μέγα κλέος ἤρατʹ ὀπίσσω .

1.241 νῦν δέ μιν ἀκλειῶς ἅρπυιαι ἀνηρείψαντο ·

1.242 οἴχετʹ ἄιστος ἄπυστος , ἐμοὶ δʹ ὀδύνας τε γόους τε

1.243 κάλλιπεν . οὐδέ τι κεῖνον ὀδυρόμενος στεναχίζω

1.244 οἶον , ἐπεί νύ μοι ἄλλα θεοὶ κακὰ κήδεʹ ἔτευξαν .

1.245 ὅσσοι γὰρ νήσοισιν ἐπικρατέουσιν ἄριστοι ,

1.246 Δουλιχίῳ τε Σάμῃ τε καὶ ὑλήεντι Ζακύνθῳ ,

1.247 ἠδʹ ὅσσοι κραναὴν Ἰθάκην κάτα κοιρανέουσιν ,

1.248 τόσσοι μητέρʹ ἐμὴν μνῶνται , τρύχουσι δὲ οἶκον .

1.249 ἡ δʹ οὔτʹ ἀρνεῖται στυγερὸν γάμον οὔτε τελευτὴν

1.250 ποιῆσαι δύναται · τοὶ δὲ φθινύθουσιν ἔδοντες

1.251 οἶκον ἐμόν · τάχα δή με διαρραίσουσι καὶ αὐτόν .

1.252 τὸν δʹ ἐπαλαστήσασα προσηύδα Παλλὰς Ἀθήνη ·

1.253 ὢ πόποι , ἦ δὴ πολλὸν ἀποιχομένου Ὀδυσῆος

1.254 δεύῃ , ὅ κε μνηστῆρσιν ἀναιδέσι χεῖρας ἐφείη .

1.255 εἰ γὰρ νῦν ἐλθὼν δόμου ἐν πρώτῃσι θύρῃσι

1.256 σταίη , ἔχων πήληκα καὶ ἀσπίδα καὶ δύο δοῦρε ,

1.257 τοῖος ἐὼν οἷόν μιν ἐγὼ τὰ πρῶτʹ ἐνόησα

1.258 οἴκῳ ἐν ἡμετέρῳ πίνοντά τε τερπόμενόν τε ,

1.259 ἐξ Ἐφύρης ἀνιόντα παρʹ Ἴλου Μερμερίδαο —

1.260 ᾤχετο γὰρ καὶ κεῖσε θοῆς ἐπὶ νηὸς Ὀδυσσεὺς

1.261 φάρμακον ἀνδροφόνον διζήμενος , ὄφρα οἱ εἴη

1.262 ἰοὺς χρίεσθαι χαλκήρεας · ἀλλʹ ὁ μὲν οὔ οἱ

1.263 δῶκεν , ἐπεί ῥα θεοὺς νεμεσίζετο αἰὲν ἐόντας ,

1.264 ἀλλὰ πατήρ οἱ δῶκεν ἐμός · φιλέεσκε γὰρ αἰνῶς —

1.265 τοῖος ἐὼν μνηστῆρσιν ὁμιλήσειεν Ὀδυσσεύς ·

1.266 πάντες κʹ ὠκύμοροί τε γενοίατο πικρόγαμοί τε .