Greek Reader — The Homeric Odyssey (1.182

1.182 νῦν δʹ ὧδε ξὺν νηὶ κατήλυθον ἠδʹ ἑτάροισιν

1.183 πλέων ἐπὶ οἴνοπα πόντον ἐπʹ ἀλλοθρόους ἀνθρώπους ,

1.184 ἐς Τεμέσην μετὰ χαλκόν , ἄγω δʹ αἴθωνα σίδηρον .

1.185 νηῦς δέ μοι ἥδʹ ἕστηκεν ἐπʹ ἀγροῦ νόσφι πόληος ,

1.186 ἐν λιμένι Ῥείθρῳ ὑπὸ Νηίῳ ὑλήεντι .

1.187 ξεῖνοι δʹ ἀλλήλων πατρώιοι εὐχόμεθʹ εἶναι

1.188 ἐξ ἀρχῆς , εἴ πέρ τε γέροντʹ εἴρηαι ἐπελθὼν

1.189 Λαέρτην ἥρωα , τὸν οὐκέτι φασὶ πόλινδε

1.190 ἔρχεσθʹ , ἀλλʹ ἀπάνευθεν ἐπʹ ἀγροῦ πήματα πάσχειν

1.191 γρηὶ σὺν ἀμφιπόλῳ , ἥ οἱ βρῶσίν τε πόσιν τε

1.192 παρτιθεῖ , εὖτʹ ἄν μιν κάματος κατὰ γυῖα λάβῃσιν

1.193 ἑρπύζοντʹ ἀνὰ γουνὸν ἀλωῆς οἰνοπέδοιο .

1.194 νῦν δʹ ἦλθον · δὴ γάρ μιν ἔφαντʹ ἐπιδήμιον εἶναι ,

1.195 σὸν πατέρʹ · ἀλλά νυ τόν γε θεοὶ βλάπτουσι κελεύθου .

1.196 οὐ γάρ πω τέθνηκεν ἐπὶ χθονὶ δῖος Ὀδυσσεύς ,

1.197 ἀλλʹ ἔτι που ζωὸς κατερύκεται εὐρέι πόντῳ

1.198 νήσῳ ἐν ἀμφιρύτῃ , χαλεποὶ δέ μιν ἄνδρες ἔχουσιν

1.199 ἄγριοι , οἵ που κεῖνον ἐρυκανόωσʹ ἀέκοντα .

1.200 αὐτὰρ νῦν τοι ἐγὼ μαντεύσομαι , ὡς ἐνὶ θυμῷ

1.201 ἀθάνατοι βάλλουσι καὶ ὡς τελέεσθαι ὀίω ,

1.202 οὔτε τι μάντις ἐὼν οὔτʹ οἰωνῶν σάφα εἰδώς .

1.203 οὔ τοι ἔτι δηρόν γε φίλης ἀπὸ πατρίδος αἴης

1.204 ἔσσεται , οὐδʹ εἴ πέρ τε σιδήρεα δέσματʹ ἔχῃσιν ·

1.205 φράσσεται ὥς κε νέηται , ἐπεὶ πολυμήχανός ἐστιν .

1.206 ἀλλʹ ἄγε μοι τόδε εἰπὲ καὶ ἀτρεκέως κατάλεξον ,

1.207 εἰ δὴ ἐξ αὐτοῖο τόσος πάϊς εἰς Ὀδυσῆος .

1.208 αἰνῶς μὲν κεφαλήν τε καὶ ὄμματα καλὰ ἔοικας

1.209 κείνῳ , ἐπεὶ θαμὰ τοῖον ἐμισγόμεθʹ ἀλλήλοισιν ,

1.210 πρίν γε τὸν ἐς Τροίην ἀναβήμεναι , ἔνθα περ ἄλλοι