Greek Reader — The Homeric Odyssey (1.153

1.153 κῆρυξ δʹ ἐν χερσὶν κίθαριν περικαλλέα θῆκεν

1.154 Φημίῳ , ὅς ῥʹ ἤειδε παρὰ μνηστῆρσιν ἀνάγκῃ .

1.155 ἦ τοι ὁ φορμίζων ἀνεβάλλετο καλὸν ἀείδειν .

1.156 αὐτὰρ Τηλέμαχος προσέφη γλαυκῶπιν Ἀθήνην ,

1.157 ἄγχι σχὼν κεφαλήν , ἵνα μὴ πευθοίαθʹ οἱ ἄλλοι ·

1.158 ξεῖνε φίλʹ , ἦ καί μοι νεμεσήσεαι ὅττι κεν εἴπω ;

1.159 τούτοισιν μὲν ταῦτα μέλει , κίθαρις καὶ ἀοιδή ,

1.160 ῥεῖʹ , ἐπεὶ ἀλλότριον βίοτον νήποινον ἔδουσιν ,

1.161 ἀνέρος , οὗ δή που λεύκʹ ὀστέα πύθεται ὄμβρῳ

1.162 κείμενʹ ἐπʹ ἠπείρου , ἢ εἰν ἁλὶ κῦμα κυλίνδει .

1.163 εἰ κεῖνόν γʹ Ἰθάκηνδε ἰδοίατο νοστήσαντα ,

1.164 πάντες κʹ ἀρησαίατʹ ἐλαφρότεροι πόδας εἶναι

1.165 ἢ ἀφνειότεροι χρυσοῖό τε ἐσθῆτός τε .

1.166 νῦν δʹ ὁ μὲν ὣς ἀπόλωλε κακὸν μόρον , οὐδέ τις ἡμῖν

1.167 θαλπωρή , εἴ πέρ τις ἐπιχθονίων ἀνθρώπων

1.168 φῇσιν ἐλεύσεσθαι · τοῦ δʹ ὤλετο νόστιμον ἦμαρ .

1.169 ἀλλʹ ἄγε μοι τόδε εἰπὲ καὶ ἀτρεκέως κατάλεξον ·

1.170 τίς πόθεν εἰς ἀνδρῶν ; πόθι τοι πόλις ἠδὲ τοκῆες ;

1.171 ὁπποίης τʹ ἐπὶ νηὸς ἀφίκεο · πῶς δέ σε ναῦται

1.172 ἤγαγον εἰς Ἰθάκην ; τίνες ἔμμεναι εὐχετόωντο ;

1.173 οὐ μὲν γάρ τί σε πεζὸν ὀίομαι ἐνθάδʹ ἱκέσθαι .

1.174 καί μοι τοῦτʹ ἀγόρευσον ἐτήτυμον , ὄφρʹ ἐὺ εἰδῶ ,

1.175 ἠὲ νέον μεθέπεις ἦ καὶ πατρώιός ἐσσι

1.176 ξεῖνος , ἐπεὶ πολλοὶ ἴσαν ἀνέρες ἡμέτερον δῶ

1.177 ἄλλοι , ἐπεὶ καὶ κεῖνος ἐπίστροφος ἦν ἀνθρώπων .

1.178 τὸν δʹ αὖτε προσέειπε θεά , γλαυκῶπις Ἀθήνη ·

1.179 τοιγὰρ ἐγώ τοι ταῦτα μάλʹ ἀτρεκέως ἀγορεύσω .

1.180 Μέντης Ἀγχιάλοιο δαΐφρονος εὔχομαι εἶναι

1.181 υἱός , ἀτὰρ Ταφίοισι φιληρέτμοισιν ἀνάσσω .