Greek Reader — The Homeric Odyssey (1.122

1.122 καί μιν φωνήσας ἔπεα πτερόεντα προσηύδα ·

1.123 χαῖρε , ξεῖνε , παρʹ ἄμμι φιλήσεαι · αὐτὰρ ἔπειτα

1.124 δείπνου πασσάμενος μυθήσεαι ὅττεό σε χρή .

1.125 ὣς εἰπὼν ἡγεῖθʹ , ἡ δʹ ἕσπετο Παλλὰς Ἀθήνη .

1.126 οἱ δʹ ὅτε δή ῥʹ ἔντοσθεν ἔσαν δόμου ὑψηλοῖο ,

1.127 ἔγχος μέν ῥʹ ἔστησε φέρων πρὸς κίονα μακρὴν

1.128 δουροδόκης ἔντοσθεν ἐυξόου , ἔνθα περ ἄλλα

1.129 ἔγχεʹ Ὀδυσσῆος ταλασίφρονος ἵστατο πολλά ,

1.130 αὐτὴν δʹ ἐς θρόνον εἷσεν ἄγων , ὑπὸ λῖτα πετάσσας ,

1.131 καλὸν δαιδάλεον · ὑπὸ δὲ θρῆνυς ποσὶν ἦεν .

1.132 πὰρ δʹ αὐτὸς κλισμὸν θέτο ποικίλον , ἔκτοθεν ἄλλων

1.133 μνηστήρων , μὴ ξεῖνος ἀνιηθεὶς ὀρυμαγδῷ

1.134 δείπνῳ ἁδήσειεν , ὑπερφιάλοισι μετελθών ,

1.135 ἠδʹ ἵνα μιν περὶ πατρὸς ἀποιχομένοιο ἔροιτο .

1.136 χέρνιβα δʹ ἀμφίπολος προχόῳ ἐπέχευε φέρουσα

1.137 καλῇ χρυσείῃ , ὑπὲρ ἀργυρέοιο λέβητος ,

1.138 νίψασθαι · παρὰ δὲ ξεστὴν ἐτάνυσσε τράπεζαν .

1.139 σῖτον δʹ αἰδοίη ταμίη παρέθηκε φέρουσα ,

1.140 εἴδατα πόλλʹ ἐπιθεῖσα , χαριζομένη παρεόντων ·

1.141 δαιτρὸς δὲ κρειῶν πίνακας παρέθηκεν ἀείρας

1.142 παντοίων , παρὰ δέ σφι τίθει χρύσεια κύπελλα ·

1.143 κῆρυξ δʹ αὐτοῖσιν θάμʹ ἐπῴχετο οἰνοχοεύων .

1.144 ἐς δʹ ἦλθον μνηστῆρες ἀγήνορες . οἱ μὲν ἔπειτα

1.145 ἑξείης ἕζοντο κατὰ κλισμούς τε θρόνους τε ,

1.146 τοῖσι δὲ κήρυκες μὲν ὕδωρ ἐπὶ χεῖρας ἔχευαν ,

1.147 σῖτον δὲ δμῳαὶ παρενήνεον ἐν κανέοισιν ,

1.148 κοῦροι δὲ κρητῆρας ἐπεστέψαντο ποτοῖο .

1.149 οἱ δʹ ἐπʹ ὀνείαθʹ ἑτοῖμα προκείμενα χεῖρας ἴαλλον .

1.150 αὐτὰρ ἐπεὶ πόσιος καὶ ἐδητύος ἐξ ἔρον ἕντο

1.151 μνηστῆρες , τοῖσιν μὲν ἐνὶ φρεσὶν ἄλλα μεμήλει ,

1.152 μολπή τʹ ὀρχηστύς τε · τὰ γάρ τʹ ἀναθήματα δαιτός ·