Greek Reader — The Homeric Odyssey (1.92

1.92 μῆλʹ ἁδινὰ σφάζουσι καὶ εἰλίποδας ἕλικας βοῦς .

1.93 πέμψω δʹ ἐς Σπάρτην τε καὶ ἐς Πύλον ἠμαθόεντα

1.94 νόστον πευσόμενον πατρὸς φίλου , ἤν που ἀκούσῃ ,

1.95 ἠδʹ ἵνα μιν κλέος ἐσθλὸν ἐν ἀνθρώποισιν ἔχῃσιν .

1.96 ὣς εἰποῦσʹ ὑπὸ ποσσὶν ἐδήσατο καλὰ πέδιλα ,

1.97 ἀμβρόσια χρύσεια , τά μιν φέρον ἠμὲν ἐφʹ ὑγρὴν

1.98 ἠδʹ ἐπʹ ἀπείρονα γαῖαν ἅμα πνοιῇς ἀνέμοιο ·

1.99 εἵλετο δʹ ἄλκιμον ἔγχος , ἀκαχμένον ὀξέι χαλκῷ ,

1.100 βριθὺ μέγα στιβαρόν , τῷ δάμνησι στίχας ἀνδρῶν

1.101 ἡρώων , τοῖσίν τε κοτέσσεται ὀβριμοπάτρη .

1.102 βῆ δὲ κατʹ Οὐλύμποιο καρήνων ἀίξασα ,

1.103 στῆ δʹ Ἰθάκης ἐνὶ δήμῳ ἐπὶ προθύροις Ὀδυσῆος ,

1.104 οὐδοῦ ἐπʹ αὐλείου · παλάμῃ δʹ ἔχε χάλκεον ἔγχος ,

1.105 εἰδομένη ξείνῳ , Ταφίων ἡγήτορι Μέντῃ .

1.106 εὗρε δʹ ἄρα μνηστῆρας ἀγήνορας . οἱ μὲν ἔπειτα

1.107 πεσσοῖσι προπάροιθε θυράων θυμὸν ἔτερπον

1.108 ἥμενοι ἐν ῥινοῖσι βοῶν , οὓς ἔκτανον αὐτοί ·

1.109 κήρυκες δʹ αὐτοῖσι καὶ ὀτρηροὶ θεράποντες

1.110 οἱ μὲν οἶνον ἔμισγον ἐνὶ κρητῆρσι καὶ ὕδωρ ,

1.111 οἱ δʹ αὖτε σπόγγοισι πολυτρήτοισι τραπέζας

1.112 νίζον καὶ πρότιθεν , τοὶ δὲ κρέα πολλὰ δατεῦντο .

1.113 τὴν δὲ πολὺ πρῶτος ἴδε Τηλέμαχος θεοειδής ,

1.114 ἧστο γὰρ ἐν μνηστῆρσι φίλον τετιημένος ἦτορ ,

1.115 ὀσσόμενος πατέρʹ ἐσθλὸν ἐνὶ φρεσίν , εἴ ποθεν ἐλθὼν

1.116 μνηστήρων τῶν μὲν σκέδασιν κατὰ δώματα θείη ,

1.117 τιμὴν δʹ αὐτὸς ἔχοι καὶ δώμασιν οἷσιν ἀνάσσοι .

1.118 τὰ φρονέων , μνηστῆρσι μεθήμενος , εἴσιδʹ Ἀθήνην .

1.119 βῆ δʹ ἰθὺς προθύροιο , νεμεσσήθη δʹ ἐνὶ θυμῷ

1.120 ξεῖνον δηθὰ θύρῃσιν ἐφεστάμεν · ἐγγύθι δὲ στὰς

1.121 χεῖρʹ ἕλε δεξιτερὴν καὶ ἐδέξατο χάλκεον ἔγχος ,