Greek Reader — The Homeric Odyssey (1.60

1.60 ἐντρέπεται φίλον ἦτορ , Ὀλύμπιε . οὔ νύ τʹ Ὀδυσσεὺς

1.61 Ἀργείων παρὰ νηυσὶ χαρίζετο ἱερὰ ῥέζων

1.62 Τροίῃ ἐν εὐρείῃ ; τί νύ οἱ τόσον ὠδύσαο , Ζεῦ ;

1.63 τὴν δʹ ἀπαμειβόμενος προσέφη νεφεληγερέτα Ζεύς ·

1.64 τέκνον ἐμόν , ποῖόν σε ἔπος φύγεν ἕρκος ὀδόντων .

1.65 πῶς ἂν ἔπειτʹ Ὀδυσῆος ἐγὼ θείοιο λαθοίμην ,

1.66 ὃς περὶ μὲν νόον ἐστὶ βροτῶν , περὶ δʹ ἱρὰ θεοῖσιν

1.67 ἀθανάτοισιν ἔδωκε , τοὶ οὐρανὸν εὐρὺν ἔχουσιν ;

1.68 ἀλλὰ Ποσειδάων γαιήοχος ἀσκελὲς αἰεὶ

1.69 Κύκλωπος κεχόλωται , ὃν ὀφθαλμοῦ ἀλάωσεν ,

1.70 ἀντίθεον Πολύφημον , ὅου κράτος ἐστὶ μέγιστον

1.71 πᾶσιν Κυκλώπεσσι · Θόωσα δέ μιν τέκε νύμφη ,

1.72 Φόρκυνος θυγάτηρ ἁλὸς ἀτρυγέτοιο μέδοντος ,

1.73 ἐν σπέσσι γλαφυροῖσι Ποσειδάωνι μιγεῖσα .

1.74 ἐκ τοῦ δὴ Ὀδυσῆα Ποσειδάων ἐνοσίχθων

1.75 οὔ τι κατακτείνει , πλάζει δʹ ἀπὸ πατρίδος αἴης .

1.76 ἀλλʹ ἄγεθʹ , ἡμεῖς οἵδε περιφραζώμεθα πάντες

1.77 νόστον , ὅπως ἔλθῃσι · Ποσειδάων δὲ μεθήσει

1.78 ὃν χόλον · οὐ μὲν γάρ τι δυνήσεται ἀντία πάντων

1.79 ἀθανάτων ἀέκητι θεῶν ἐριδαινέμεν οἶος .

1.80 τὸν δʹ ἠμείβετʹ ἔπειτα θεά , γλαυκῶπις Ἀθήνη ·

1.81 ὦ πάτερ ἡμέτερε Κρονίδη , ὕπατε κρειόντων ,

1.82 εἰ μὲν δὴ νῦν τοῦτο φίλον μακάρεσσι θεοῖσιν ,

1.83 νοστῆσαι Ὀδυσῆα πολύφρονα ὅνδε δόμονδε ,

1.84 Ἑρμείαν μὲν ἔπειτα διάκτορον ἀργεϊφόντην

1.85 νῆσον ἐς Ὠγυγίην ὀτρύνομεν , ὄφρα τάχιστα

1.86 νύμφῃ ἐυπλοκάμῳ εἴπῃ νημερτέα βουλήν ,

1.87 νόστον Ὀδυσσῆος ταλασίφρονος , ὥς κε νέηται ·

1.88 αὐτὰρ ἐγὼν Ἰθάκηνδʹ ἐσελεύσομαι , ὄφρα οἱ υἱὸν

1.89 μᾶλλον ἐποτρύνω καί οἱ μένος ἐν φρεσὶ θείω ,

1.90 εἰς ἀγορὴν καλέσαντα κάρη κομόωντας Ἀχαιοὺς

1.91 πᾶσι μνηστήρεσσιν ἀπειπέμεν , οἵ τέ οἱ αἰεὶ