Greek Reader — The Homeric Odyssey (1.31

1.31 τοῦ ὅ γʹ ἐπιμνησθεὶς ἔπεʹ ἀθανάτοισι μετηύδα ·

1.32 ὢ πόποι , οἷον δή νυ θεοὺς βροτοὶ αἰτιόωνται ·

1.33 ἐξ ἡμέων γάρ φασι κάκʹ ἔμμεναι , οἱ δὲ καὶ αὐτοὶ

1.34 σφῇσιν ἀτασθαλίῃσιν ὑπὲρ μόρον ἄλγεʹ ἔχουσιν ,

1.35 ὡς καὶ νῦν Αἴγισθος ὑπὲρ μόρον Ἀτρεΐδαο

1.36 γῆμʹ ἄλοχον μνηστήν , τὸν δʹ ἔκτανε νοστήσαντα ,

1.37 εἰδὼς αἰπὺν ὄλεθρον , ἐπεὶ πρό οἱ εἴπομεν ἡμεῖς ,

1.38 Ἑρμείαν πέμψαντες , ἐύσκοπον ἀργεϊφόντην ,

1.39 μήτʹ αὐτὸν κτείνειν μήτε μνάασθαι ἄκοιτιν ·

1.40 ἐκ γὰρ Ὀρέσταο τίσις ἔσσεται Ἀτρεΐδαο ,

1.41 ὁππότʹ ἂν ἡβήσῃ τε καὶ ἧς ἱμείρεται αἴης .

1.42 ὣς ἔφαθʹ Ἑρμείας , ἀλλʹ οὐ φρένας Αἰγίσθοιο

1.43 πεῖθʹ ἀγαθὰ φρονέων · νῦν δʹ ἁθρόα πάντʹ ἀπέτισεν .

1.44 τὸν δʹ ἠμείβετʹ ἔπειτα θεά , γλαυκῶπις Ἀθήνη ·

1.45 ὦ πάτερ ἡμέτερε Κρονίδη , ὕπατε κρειόντων ,

1.46 καὶ λίην κεῖνός γε ἐοικότι κεῖται ὀλέθρῳ ·

1.47 ὡς ἀπόλοιτο καὶ ἄλλος , ὅτις τοιαῦτά γε ῥέζοι ·

1.48 ἀλλά μοι ἀμφʹ Ὀδυσῆι δαΐφρονι δαίεται ἦτορ ,

1.49 δυσμόρῳ , ὃς δὴ δηθὰ φίλων ἄπο πήματα πάσχει

1.50 νήσῳ ἐν ἀμφιρύτῃ , ὅθι τʹ ὀμφαλός ἐστι θαλάσσης .

1.51 νῆσος δενδρήεσσα , θεὰ δʹ ἐν δώματα ναίει ,

1.52 Ἄτλαντος θυγάτηρ ὀλοόφρονος , ὅς τε θαλάσσης

1.53 πάσης βένθεα οἶδεν , ἔχει δέ τε κίονας αὐτὸς

1.54 μακράς , αἳ γαῖάν τε καὶ οὐρανὸν ἀμφὶς ἔχουσιν .

1.55 τοῦ θυγάτηρ δύστηνον ὀδυρόμενον κατερύκει ,

1.56 αἰεὶ δὲ μαλακοῖσι καὶ αἱμυλίοισι λόγοισιν

1.57 θέλγει , ὅπως Ἰθάκης ἐπιλήσεται · αὐτὰρ Ὀδυσσεύς ,

1.58 ἱέμενος καὶ καπνὸν ἀποθρῴσκοντα νοῆσαι

1.59 ἧς γαίης , θανέειν ἱμείρεται . οὐδέ νυ σοί περ