Greek Reader — The Homeric Odyssey (1.1

1.1 ἄνδρα μοι ἔννεπε , μοῦσα , πολύτροπον , ὃς μάλα πολλὰ

1.2 πλάγχθη , ἐπεὶ Τροίης ἱερὸν πτολίεθρον ἔπερσεν ·

1.3 πολλῶν δʹ ἀνθρώπων ἴδεν ἄστεα καὶ νόον ἔγνω ,

1.4 πολλὰ δʹ ὅ γʹ ἐν πόντῳ πάθεν ἄλγεα ὃν κατὰ θυμόν ,

1.5 ἀρνύμενος ἥν τε ψυχὴν καὶ νόστον ἑταίρων .

1.6 ἀλλʹ οὐδʹ ὣς ἑτάρους ἐρρύσατο , ἱέμενός περ ·

1.7 αὐτῶν γὰρ σφετέρῃσιν ἀτασθαλίῃσιν ὄλοντο ,

1.8 νήπιοι , οἳ κατὰ βοῦς Ὑπερίονος Ἠελίοιο

1.9 ἤσθιον · αὐτὰρ ὁ τοῖσιν ἀφείλετο νόστιμον ἦμαρ .

1.10 τῶν ἁμόθεν γε , θεά , θύγατερ Διός , εἰπὲ καὶ ἡμῖν .

1.11 ἔνθʹ ἄλλοι μὲν πάντες , ὅσοι φύγον αἰπὺν ὄλεθρον ,

1.12 οἴκοι ἔσαν , πόλεμόν τε πεφευγότες ἠδὲ θάλασσαν ·

1.13 τὸν δʹ οἶον νόστου κεχρημένον ἠδὲ γυναικὸς

1.14 νύμφη πότνιʹ ἔρυκε Καλυψὼ δῖα θεάων

1.15 ἐν σπέσσι γλαφυροῖσι , λιλαιομένη πόσιν εἶναι .

1.16 ἀλλʹ ὅτε δὴ ἔτος ἦλθε περιπλομένων ἐνιαυτῶν ,

1.17 τῷ οἱ ἐπεκλώσαντο θεοὶ οἶκόνδε νέεσθαι

1.18 εἰς Ἰθάκην , οὐδʹ ἔνθα πεφυγμένος ἦεν ἀέθλων

1.19 καὶ μετὰ οἷσι φίλοισι . θεοὶ δʹ ἐλέαιρον ἅπαντες

1.20 νόσφι Ποσειδάωνος · ὁ δʹ ἀσπερχὲς μενέαινεν

1.21 ἀντιθέῳ Ὀδυσῆι πάρος ἣν γαῖαν ἱκέσθαι .

1.22 ἀλλʹ ὁ μὲν Αἰθίοπας μετεκίαθε τηλόθʹ ἐόντας ,

1.23 Αἰθίοπας τοὶ διχθὰ δεδαίαται , ἔσχατοι ἀνδρῶν ,

1.24 οἱ μὲν δυσομένου Ὑπερίονος οἱ δʹ ἀνιόντος ,

1.25 ἀντιόων ταύρων τε καὶ ἀρνειῶν ἑκατόμβης .

1.26 ἔνθʹ ὅ γʹ ἐτέρπετο δαιτὶ παρήμενος · οἱ δὲ δὴ ἄλλοι

1.27 Ζηνὸς ἐνὶ μεγάροισιν Ὀλυμπίου ἁθρόοι ἦσαν .

1.28 τοῖσι δὲ μύθων ἦρχε πατὴρ ἀνδρῶν τε θεῶν τε ·

1.29 μνήσατο γὰρ κατὰ θυμὸν ἀμύμονος Αἰγίσθοιο ,

1.30 τόν ῥʹ Ἀγαμεμνονίδης τηλεκλυτὸς ἔκτανʹ Ὀρέστης ·