Greek Reader — The Homeric Iliad (9.671

9.671 δειδέχατ’ ἄλλοθεν ἄλλος ἀνασταδόν , ἔκ τ’ ἐρέοντο ·

9.672 πρῶτος δ’ ἐξερέεινεν ἄναξ ἀνδρῶν Ἀγαμέμνων ·

9.673 εἴπ’ ἄγε μ’ ὦ πολύαιν’ Ὀδυσεῦ μέγα κῦδος Ἀχαιῶν

9.674 ἤ ῥ’ ἐθέλει νήεσσιν ἀλεξέμεναι δήϊον πῦρ ,

9.675 ἦ ἀπέειπε , χόλος δ’ ἔτ’ ἔχει μεγαλήτορα θυμόν ;

9.676 τὸν δ’ αὖτε προσέειπε πολύτλας δῖος Ὀδυσσεύς ·

9.677 Ἀτρεΐδη κύδιστε ἄναξ ἀνδρῶν Ἀγάμεμνον

9.678 κεῖνός γ’ οὐκ ἐθέλει σβέσσαι χόλον , ἀλλ’ ἔτι μᾶλλον

9.679 πιμπλάνεται μένεος , σὲ δ’ ἀναίνεται ἠδὲ σὰ δῶρα .

9.680 αὐτόν σε φράζεσθαι ἐν Ἀργείοισιν ἄνωγεν

9.681 ὅππως κεν νῆάς τε σαῷς καὶ λαὸν Ἀχαιῶν ·

9.682 αὐτὸς δ’ ἠπείλησεν ἅμ’ ἠοῖ φαινομένηφι

9.683 νῆας ἐϋσσέλμους ἅλαδ’ ἑλκέμεν ἀμφιελίσσας .

9.684 καὶ δ’ ἂν τοῖς ἄλλοισιν ἔφη παραμυθήσασθαι

9.685 οἴκαδ’ ἀποπλείειν , ἐπεὶ οὐκέτι δήετε τέκμωρ

9.686 Ἰλίου αἰπεινῆς · μάλα γάρ ἑθεν εὐρύοπα Ζεὺς

9.687 χεῖρα ἑὴν ὑπερέσχε , τεθαρσήκασι δὲ λαοί .

9.688 ὣς ἔφατ’ · εἰσὶ καὶ οἵδε τάδ’ εἰπέμεν , οἵ μοι ἕποντο ,

9.689 Αἴας καὶ κήρυκε δύω πεπνυμένω ἄμφω .

9.690 Φοῖνιξ δ’ αὖθ’ ὃ γέρων κατελέξατο , ὡς γὰρ ἀνώγει ,

9.691 ὄφρά οἱ ἐν νήεσσι φίλην ἐς πατρίδ’ ἕπηται

9.692 αὔριον , ἢν ἐθέλῃσιν · ἀνάγκῃ δ’ οὔ τί μιν ἄξει .

9.693 ὣς ἔφαθ’ , οἳ δ’ ἄρα πάντες ἀκὴν ἐγένοντο σιωπῇ

9.694 μῦθον ἀγασσάμενοι · μάλα γὰρ κρατερῶς ἀγόρευσε .

9.695 δὴν δ’ ἄνεῳ ἦσαν τετιηότες υἷες Ἀχαιῶν ·

9.696 ὀψὲ δὲ δὴ μετέειπε βοὴν ἀγαθὸς Διομήδης ·

9.697 Ἀτρεΐδη κύδιστε ἄναξ ἀνδρῶν Ἀγάμεμνον

9.698 μὴ ὄφελες λίσσεσθαι ἀμύμονα Πηλεΐωνα

9.699 μυρία δῶρα διδούς · ὃ δ’ ἀγήνωρ ἐστὶ καὶ ἄλλως ·

9.700 νῦν αὖ μιν πολὺ μᾶλλον ἀγηνορίῃσιν ἐνῆκας .