Greek Reader — The Homeric Iliad (9.639

9.639 ἄλλά τε πόλλ’ ἐπὶ τῇσι · σὺ δ’ ἵλαον ἔνθεο θυμόν ,

9.640 αἴδεσσαι δὲ μέλαθρον · ὑπωρόφιοι δέ τοί εἰμεν

9.641 πληθύος ἐκ Δαναῶν , μέμαμεν δέ τοι ἔξοχον ἄλλων

9.642 κήδιστοί τ’ ἔμεναι καὶ φίλτατοι ὅσσοι Ἀχαιοί .

9.643 τὸν δ’ ἀπαμειβόμενος προσέφη πόδας ὠκὺς Ἀχιλλεύς ·

9.644 Αἶαν διογενὲς Τελαμώνιε κοίρανε λαῶν

9.645 πάντά τί μοι κατὰ θυμὸν ἐείσαο μυθήσασθαι ·

9.646 ἀλλά μοι οἰδάνεται κραδίη χόλῳ ὁππότε κείνων

9.647 μνήσομαι ὥς μ’ ἀσύφηλον ἐν Ἀργείοισιν ἔρεξεν

9.648 Ἀτρεΐδης ὡς εἴ τιν’ ἀτίμητον μετανάστην .

9.649 ἀλλ’ ὑμεῖς ἔρχεσθε καὶ ἀγγελίην ἀπόφασθε ·

9.650 οὐ γὰρ πρὶν πολέμοιο μεδήσομαι αἱματόεντος

9.651 πρίν γ’ υἱὸν Πριάμοιο δαΐφρονος Ἕκτορα δῖον

9.652 Μυρμιδόνων ἐπί τε κλισίας καὶ νῆας ἱκέσθαι

9.653 κτείνοντ’ Ἀργείους , κατά τε σμῦξαι πυρὶ νῆας .

9.654 ἀμφὶ δέ τοι τῇ ἐμῇ κλισίῃ καὶ νηῒ μελαίνῃ

9.655 Ἕκτορα καὶ μεμαῶτα μάχης σχήσεσθαι ὀΐω .

9.656 ὣς ἔφαθ’ , οἳ δὲ ἕκαστος ἑλὼν δέπας ἀμφικύπελλον

9.657 σπείσαντες παρὰ νῆας ἴσαν πάλιν · ἦρχε δ’ Ὀδυσσεύς .

9.658 Πάτροκλος δ’ ἑτάροισιν ἰδὲ δμωῇσι κέλευσε

9.659 Φοίνικι στορέσαι πυκινὸν λέχος ὅττι τάχιστα .

9.660 αἳ δ’ ἐπιπειθόμεναι στόρεσαν λέχος ὡς ἐκέλευσε

9.661 κώεά τε ῥῆγός τε λίνοιό τε λεπτὸν ἄωτον .

9.662 ἔνθ’ ὃ γέρων κατέλεκτο καὶ ἠῶ δῖαν ἔμιμνεν .

9.663 αὐτὰρ Ἀχιλλεὺς εὗδε μυχῷ κλισίης εὐπήκτου ·

9.664 τῷ δ’ ἄρα παρκατέλεκτο γυνή , τὴν Λεσβόθεν ἦγε ,

9.665 Φόρβαντος θυγάτηρ Διομήδη καλλιπάρῃος .

9.666 Πάτροκλος δ’ ἑτέρωθεν ἐλέξατο · πὰρ δ’ ἄρα καὶ τῷ

9.667 Ἶφις ἐΰζωνος , τήν οἱ πόρε δῖος Ἀχιλλεὺς

9.668 Σκῦρον ἑλὼν αἰπεῖαν Ἐνυῆος πτολίεθρον .

9.669 οἳ δ’ ὅτε δὴ κλισίῃσιν ἐν Ἀτρεΐδαο γένοντο .

9.670 τοὺς μὲν ἄρα χρυσέοισι κυπέλλοις υἷες Ἀχαιῶν