Greek Reader — The Homeric Iliad (9.391

9.391 οὐδέ μιν ὧς γαμέω · ὃ δ’ Ἀχαιῶν ἄλλον ἑλέσθω ,

9.392 ὅς τις οἷ τ’ ἐπέοικε καὶ ὃς βασιλεύτερός ἐστιν .

9.393 ἢν γὰρ δή με σαῶσι θεοὶ καὶ οἴκαδ’ ἵκωμαι ,

9.394 Πηλεύς θήν μοι ἔπειτα γυναῖκά γε μάσσεται αὐτός .

9.395 πολλαὶ Ἀχαιΐδες εἰσὶν ἀν’ Ἑλλάδα τε Φθίην τε

9.396 κοῦραι ἀριστήων , οἵ τε πτολίεθρα ῥύονται ,

9.397 τάων ἥν κ’ ἐθέλωμι φίλην ποιήσομ’ ἄκοιτιν .

9.398 ἔνθα δέ μοι μάλα πολλὸν ἐπέσσυτο θυμὸς ἀγήνωρ

9.399 γήμαντα μνηστὴν ἄλοχον ἐϊκυῖαν ἄκοιτιν

9.400 κτήμασι τέρπεσθαι τὰ γέρων ἐκτήσατο Πηλεύς ·

9.401 οὐ γὰρ ἐμοὶ ψυχῆς ἀντάξιον οὐδ’ ὅσα φασὶν

9.402 Ἴλιον ἐκτῆσθαι εὖ ναιόμενον πτολίεθρον

9.403 τὸ πρὶν ἐπ’ εἰρήνης , πρὶν ἐλθεῖν υἷας Ἀχαιῶν ,

9.404 οὐδ’ ὅσα λάϊνος οὐδὸς ἀφήτορος ἐντὸς ἐέργει

9.405 Φοίβου Ἀπόλλωνος Πυθοῖ ἔνι πετρηέσσῃ .

9.406 ληϊστοὶ μὲν γάρ τε βόες καὶ ἴφια μῆλα ,

9.407 κτητοὶ δὲ τρίποδές τε καὶ ἵππων ξανθὰ κάρηνα ,

9.408 ἀνδρὸς δὲ ψυχὴ πάλιν ἐλθεῖν οὔτε λεϊστὴ

9.409 οὔθ’ ἑλετή , ἐπεὶ ἄρ κεν ἀμείψεται ἕρκος ὀδόντων .

9.410 μήτηρ γάρ τέ μέ φησι θεὰ Θέτις ἀργυρόπεζα

9.411 διχθαδίας κῆρας φερέμεν θανάτοιο τέλος δέ .

9.412 εἰ μέν κ’ αὖθι μένων Τρώων πόλιν ἀμφιμάχωμαι ,

9.413 ὤλετο μέν μοι νόστος , ἀτὰρ κλέος ἄφθιτον ἔσται ·

9.414 εἰ δέ κεν οἴκαδ’ ἵκωμι φίλην ἐς πατρίδα γαῖαν ,

9.415 ὤλετό μοι κλέος ἐσθλόν , ἐπὶ δηρὸν δέ μοι αἰὼν

9.416 ἔσσεται , οὐδέ κέ μ’ ὦκα τέλος θανάτοιο κιχείη .

9.417 καὶ δ’ ἂν τοῖς ἄλλοισιν ἐγὼ παραμυθησαίμην

9.418 οἴκαδ’ ἀποπλείειν , ἐπεὶ οὐκέτι δήετε τέκμωρ

9.419 Ἰλίου αἰπεινῆς · μάλα γάρ ἑθεν εὐρύοπα Ζεὺς

9.420 χεῖρα ἑὴν ὑπερέσχε , τεθαρσήκασι δὲ λαοί .