Greek Reader — The Homeric Iliad (9.363

9.363 ἤματί κε τριτάτῳ Φθίην ἐρίβωλον ἱκοίμην .

9.364 ἔστι δέ μοι μάλα πολλά , τὰ κάλλιπον ἐνθάδε ἔρρων ·

9.365 ἄλλον δ’ ἐνθένδε χρυσὸν καὶ χαλκὸν ἐρυθρὸν

9.366 ἠδὲ γυναῖκας ἐϋζώνους πολιόν τε σίδηρον

9.367 ἄξομαι , ἅσσ’ ἔλαχόν γε · γέρας δέ μοι , ὅς περ ἔδωκεν ,

9.368 αὖτις ἐφυβρίζων ἕλετο κρείων Ἀγαμέμνων

9.369 Ἀτρεΐδης · τῷ πάντ’ ἀγορευέμεν ὡς ἐπιτέλλω

9.370 ἀμφαδόν , ὄφρα καὶ ἄλλοι ἐπισκύζωνται Ἀχαιοὶ

9.371 εἴ τινά που Δαναῶν ἔτι ἔλπεται ἐξαπατήσειν

9.372 αἰὲν ἀναιδείην ἐπιειμένος · οὐδ’ ἂν ἔμοιγε

9.373 τετλαίη κύνεός περ ἐὼν εἰς ὦπα ἰδέσθαι ·

9.374 οὐδέ τί οἱ βουλὰς συμφράσσομαι , οὐδὲ μὲν ἔργον ·

9.375 ἐκ γὰρ δή μ’ ἀπάτησε καὶ ἤλιτεν · οὐδ’ ἂν ἔτ’ αὖτις

9.376 ἐξαπάφοιτ’ ἐπέεσσιν · ἅλις δέ οἱ · ἀλλὰ ἕκηλος

9.377 ἐρρέτω · ἐκ γάρ εὑ φρένας εἵλετο μητίετα Ζεύς .

9.378 ἐχθρὰ δέ μοι τοῦ δῶρα , τίω δέ μιν ἐν καρὸς αἴσῃ .

9.379 οὐδ’ εἴ μοι δεκάκις τε καὶ εἰκοσάκις τόσα δοίη

9.380 ὅσσά τέ οἱ νῦν ἔστι , καὶ εἴ ποθεν ἄλλα γένοιτο ,

9.381 οὐδ’ ὅσ’ ἐς Ὀρχομενὸν ποτινίσεται , οὐδ’ ὅσα Θήβας

9.382 Αἰγυπτίας , ὅθι πλεῖστα δόμοις ἐν κτήματα κεῖται ,

9.383 αἵ θ’ ἑκατόμπυλοί εἰσι , διηκόσιοι δ’ ἀν’ ἑκάστας

9.384 ἀνέρες ἐξοιχνεῦσι σὺν ἵπποισιν καὶ ὄχεσφιν ·

9.385 οὐδ’ εἴ μοι τόσα δοίη ὅσα ψάμαθός τε κόνις τε ,

9.386 οὐδέ κεν ὧς ἔτι θυμὸν ἐμὸν πείσει’ Ἀγαμέμνων

9.387 πρίν γ’ ἀπὸ πᾶσαν ἐμοὶ δόμεναι θυμαλγέα λώβην .

9.388 κούρην δ’ οὐ γαμέω Ἀγαμέμνονος Ἀτρεΐδαο ,

9.389 οὐδ’ εἰ χρυσείῃ Ἀφροδίτῃ κάλλος ἐρίζοι ,

9.390 ἔργα δ’ Ἀθηναίῃ γλαυκώπιδι ἰσοφαρίζοι ·