Greek Reader — The Homeric Iliad (9.245

9.245 ἐκτελέσωσι θεοί , ἡμῖν δὲ δὴ αἴσιμον εἴη

9.246 φθίσθαι ἐνὶ Τροίῃ ἑκὰς Ἄργεος ἱπποβότοιο .

9.247 ἀλλ’ ἄνα εἰ μέμονάς γε καὶ ὀψέ περ υἷας Ἀχαιῶν

9.248 τειρομένους ἐρύεσθαι ὑπὸ Τρώων ὀρυμαγδοῦ .

9.249 αὐτῷ τοι μετόπισθ’ ἄχος ἔσσεται , οὐδέ τι μῆχος

9.250 ῥεχθέντος κακοῦ ἔστ’ ἄκος εὑρεῖν · ἀλλὰ πολὺ πρὶν

9.251 φράζευ ὅπως Δαναοῖσιν ἀλεξήσεις κακὸν ἦμαρ .

9.252 ὦ πέπον ἦ μὲν σοί γε πατὴρ ἐπετέλλετο Πηλεὺς

9.253 ἤματι τῷ ὅτε σ’ ἐκ Φθίης Ἀγαμέμνονι πέμπε ·

9.254 τέκνον ἐμὸν κάρτος μὲν Ἀθηναίη τε καὶ Ἥρη

9.255 δώσουσ’ αἴ κ’ ἐθέλωσι , σὺ δὲ μεγαλήτορα θυμὸν

9.256 ἴσχειν ἐν στήθεσσι · φιλοφροσύνη γὰρ ἀμείνων ·

9.257 ληγέμεναι δ’ ἔριδος κακομηχάνου , ὄφρά σε μᾶλλον

9.258 τίωσ’ Ἀργείων ἠμὲν νέοι ἠδὲ γέροντες .

9.259 ὣς ἐπέτελλ’ ὃ γέρων , σὺ δὲ λήθεαι · ἀλλ’ ἔτι καὶ νῦν

9.260 παύε’ , ἔα δὲ χόλον θυμαλγέα · σοὶ δ’ Ἀγαμέμνων

9.261 ἄξια δῶρα δίδωσι μεταλήξαντι χόλοιο .

9.262 εἰ δὲ σὺ μέν μευ ἄκουσον , ἐγὼ δέ κέ τοι καταλέξω

9.263 ὅσσά τοι ἐν κλισίῃσιν ὑπέσχετο δῶρ’ Ἀγαμέμνων ·

9.264 ἕπτ’ ἀπύρους τρίποδας , δέκα δὲ χρυσοῖο τάλαντα ,

9.265 αἴθωνας δὲ λέβητας ἐείκοσι , δώδεκα δ’ ἵππους

9.266 πηγοὺς ἀθλοφόρους , οἳ ἀέθλια ποσσὶν ἄροντο .

9.267 οὔ κεν ἀλήϊος εἴη ἀνὴρ ᾧ τόσσα γένοιτο

9.268 οὐδέ κεν ἀκτήμων ἐριτίμοιο χρυσοῖο ,

9.269 ὅσσ’ Ἀγαμέμνονος ἵπποι ἀέθλια ποσσὶν ἄροντο .

9.270 δώσει δ’ ἑπτὰ γυναῖκας ἀμύμονα ἔργα ἰδυίας

9.271 Λεσβίδας , ἃς ὅτε Λέσβον ἐϋκτιμένην ἕλες αὐτὸς

9.272 ἐξέλεθ’ , αἳ τότε κάλλει ἐνίκων φῦλα γυναικῶν .

9.273 τὰς μέν τοι δώσει , μετὰ δ’ ἔσσεται ἣν τότ’ ἀπηύρα