Greek Reader — The Homeric Iliad (9.213

9.213 ἀνθρακιὴν στορέσας ὀβελοὺς ἐφύπερθε τάνυσσε ,

9.214 πάσσε δ’ ἁλὸς θείοιο κρατευτάων ἐπαείρας .

9.215 αὐτὰρ ἐπεί ῥ’ ὤπτησε καὶ εἰν ἐλεοῖσιν ἔχευε ,

9.216 Πάτροκλος μὲν σῖτον ἑλὼν ἐπένειμε τραπέζῃ

9.217 καλοῖς ἐν κανέοισιν , ἀτὰρ κρέα νεῖμεν Ἀχιλλεύς .

9.218 αὐτὸς δ’ ἀντίον ἷζεν Ὀδυσσῆος θείοιο

9.219 τοίχου τοῦ ἑτέροιο , θεοῖσι δὲ θῦσαι ἀνώγει

9.220 Πάτροκλον ὃν ἑταῖρον · ὃ δ’ ἐν πυρὶ βάλλε θυηλάς .

9.221 οἳ δ’ ἐπ’ ὀνείαθ’ ἑτοῖμα προκείμενα χεῖρας ἴαλλον .

9.222 αὐτὰρ ἐπεὶ πόσιος καὶ ἐδητύος ἐξ ἔρον ἕντο ,

9.223 νεῦσ’ Αἴας Φοίνικι · νόησε δὲ δῖος Ὀδυσσεύς ,

9.224 πλησάμενος δ’ οἴνοιο δέπας δείδεκτ’ Ἀχιλῆα ·

9.225 χαῖρ’ Ἀχιλεῦ · δαιτὸς μὲν ἐΐσης οὐκ ἐπιδευεῖς

9.226 ἠμὲν ἐνὶ κλισίῃ Ἀγαμέμνονος Ἀτρεΐδαο

9.227 ἠδὲ καὶ ἐνθάδε νῦν , πάρα γὰρ μενοεικέα πολλὰ

9.228 δαίνυσθ’ · ἀλλ’ οὐ δαιτὸς ἐπηράτου ἔργα μέμηλεν ,

9.229 ἀλλὰ λίην μέγα πῆμα διοτρεφὲς εἰσορόωντες

9.230 δείδιμεν · ἐν δοιῇ δὲ σαωσέμεν ἢ ἀπολέσθαι

9.231 νῆας ἐϋσσέλμους , εἰ μὴ σύ γε δύσεαι ἀλκήν .

9.232 ἐγγὺς γὰρ νηῶν καὶ τείχεος αὖλιν ἔθεντο

9.233 Τρῶες ὑπέρθυμοι τηλεκλειτοί τ’ ἐπίκουροι

9.234 κηάμενοι πυρὰ πολλὰ κατὰ στρατόν , οὐδ’ ἔτι φασὶ

9.235 σχήσεσθ’ , ἀλλ’ ἐν νηυσὶ μελαίνῃσιν πεσέεσθαι .

9.236 Ζεὺς δέ σφι Κρονίδης ἐνδέξια σήματα φαίνων

9.237 ἀστράπτει · Ἕκτωρ δὲ μέγα σθένεϊ βλεμεαίνων

9.238 μαίνεται ἐκπάγλως πίσυνος Διί , οὐδέ τι τίει

9.239 ἀνέρας οὐδὲ θεούς · κρατερὴ δέ ἑ λύσσα δέδυκεν .

9.240 ἀρᾶται δὲ τάχιστα φανήμεναι Ἠῶ δῖαν ·

9.241 στεῦται γὰρ νηῶν ἀποκόψειν ἄκρα κόρυμβα

9.242 αὐτάς τ’ ἐμπρήσειν μαλεροῦ πυρός , αὐτὰρ Ἀχαιοὺς

9.243 δῃώσειν παρὰ τῇσιν ὀρινομένους ὑπὸ καπνοῦ .

9.244 ταῦτ’ αἰνῶς δείδοικα κατὰ φρένα , μή οἱ ἀπειλὰς