Greek Reader — The Homeric Iliad (9.185

9.185 Μυρμιδόνων δ’ ἐπί τε κλισίας καὶ νῆας ἱκέσθην ,

9.186 τὸν δ’ εὗρον φρένα τερπόμενον φόρμιγγι λιγείῃ

9.187 καλῇ δαιδαλέῃ , ἐπὶ δ’ ἀργύρεον ζυγὸν ἦεν ,

9.188 τὴν ἄρετ’ ἐξ ἐνάρων πόλιν Ἠετίωνος ὀλέσσας ·

9.189 τῇ ὅ γε θυμὸν ἔτερπεν , ἄειδε δ’ ἄρα κλέα ἀνδρῶν .

9.190 Πάτροκλος δέ οἱ οἶος ἐναντίος ἧστο σιωπῇ ,

9.191 δέγμενος Αἰακίδην ὁπότε λήξειεν ἀείδων ,

9.192 τὼ δὲ βάτην προτέρω , ἡγεῖτο δὲ δῖος Ὀδυσσεύς ,

9.193 στὰν δὲ πρόσθ’ αὐτοῖο · ταφὼν δ’ ἀνόρουσεν Ἀχιλλεὺς

9.194 αὐτῇ σὺν φόρμιγγι λιπὼν ἕδος ἔνθα θάασσεν .

9.195 ὣς δ’ αὔτως Πάτροκλος , ἐπεὶ ἴδε φῶτας , ἀνέστη .

9.196 τὼ καὶ δεικνύμενος προσέφη πόδας ὠκὺς Ἀχιλλεύς ·

9.197 χαίρετον · ἦ φίλοι ἄνδρες ἱκάνετον ἦ τι μάλα χρεώ ,

9.198 οἵ μοι σκυζομένῳ περ Ἀχαιῶν φίλτατοί ἐστον .

9.199 ὣς ἄρα φωνήσας προτέρω ἄγε δῖος Ἀχιλλεύς ,

9.200 εἷσεν δ’ ἐν κλισμοῖσι τάπησί τε πορφυρέοισιν .

9.201 αἶψα δὲ Πάτροκλον προσεφώνεεν ἐγγὺς ἐόντα ·

9.202 μείζονα δὴ κρητῆρα Μενοιτίου υἱὲ καθίστα ,

9.203 ζωρότερον δὲ κέραιε , δέπας δ’ ἔντυνον ἑκάστῳ ·

9.204 οἳ γὰρ φίλτατοι ἄνδρες ἐμῷ ὑπέασι μελάθρῳ .

9.205 ὣς φάτο , Πάτροκλος δὲ φίλῳ ἐπεπείθεθ’ ἑταίρῳ .

9.206 αὐτὰρ ὅ γε κρεῖον μέγα κάββαλεν ἐν πυρὸς αὐγῇ ,

9.207 ἐν δ’ ἄρα νῶτον ἔθηκ’ ὄϊος καὶ πίονος αἰγός ,

9.208 ἐν δὲ συὸς σιάλοιο ῥάχιν τεθαλυῖαν ἀλοιφῇ .

9.209 τῷ δ’ ἔχεν Αὐτομέδων , τάμνεν δ’ ἄρα δῖος Ἀχιλλεύς .

9.210 καὶ τὰ μὲν εὖ μίστυλλε καὶ ἀμφ’ ὀβελοῖσιν ἔπειρε ,

9.211 πῦρ δὲ Μενοιτιάδης δαῖεν μέγα ἰσόθεος φώς .

9.212 αὐτὰρ ἐπεὶ κατὰ πῦρ ἐκάη καὶ φλὸξ ἐμαράνθη ,