Greek Reader — The Homeric Iliad (9.61

9.61 ἐξείπω καὶ πάντα διίξομαι · οὐδέ κέ τίς μοι

9.62 μῦθον ἀτιμήσει’ , οὐδὲ κρείων Ἀγαμέμνων .

9.63 ἀφρήτωρ ἀθέμιστος ἀνέστιός ἐστιν ἐκεῖνος

9.64 ὃς πολέμου ἔραται ἐπιδημίου ὀκρυόεντος .

9.65 ἀλλ’ ἤτοι νῦν μὲν πειθώμεθα νυκτὶ μελαίνῃ

9.66 δόρπά τ’ ἐφοπλισόμεσθα · φυλακτῆρες δὲ ἕκαστοι

9.67 λεξάσθων παρὰ τάφρον ὀρυκτὴν τείχεος ἐκτός .

9.68 κούροισιν μὲν ταῦτ’ ἐπιτέλλομαι · αὐτὰρ ἔπειτα

9.69 Ἀτρεΐδη σὺ μὲν ἄρχε · σὺ γὰρ βασιλεύτατός ἐσσι .

9.70 δαίνυ δαῖτα γέρουσιν · ἔοικέ τοι , οὔ τοι ἀεικές .

9.71 πλεῖαί τοι οἴνου κλισίαι , τὸν νῆες Ἀχαιῶν

9.72 ἠμάτιαι Θρῄκηθεν ἐπ’ εὐρέα πόντον ἄγουσι ·

9.73 πᾶσά τοί ἐσθ’ ὑποδεξίη , πολέεσσι δ’ ἀνάσσεις .

9.74 πολλῶν δ’ ἀγρομένων τῷ πείσεαι ὅς κεν ἀρίστην

9.75 βουλὴν βουλεύσῃ · μάλα δὲ χρεὼ πάντας Ἀχαιοὺς

9.76 ἐσθλῆς καὶ πυκινῆς , ὅτι δήϊοι ἐγγύθι νηῶν

9.77 καίουσιν πυρὰ πολλά · τίς ἂν τάδε γηθήσειε ;

9.78 νὺξ δ’ ἧδ’ ἠὲ διαρραίσει στρατὸν ἠὲ σαώσει .

9.79 ὣς ἔφαθ’ , οἳ δ’ ἄρα τοῦ μάλα μὲν κλύον ἠδὲ πίθοντο .

9.80 ἐκ δὲ φυλακτῆρες σὺν τεύχεσιν ἐσσεύοντο

9.81 ἀμφί τε Νεστορίδην Θρασυμήδεα ποιμένα λαῶν ,

9.82 ἠδ’ ἀμφ’ Ἀσκάλαφον καὶ Ἰάλμενον υἷας Ἄρηος

9.83 ἀμφί τε Μηριόνην Ἀφαρῆά τε Δηΐπυρόν τε ,

9.84 ἠδ’ ἀμφὶ Κρείοντος υἱὸν Λυκομήδεα δῖον .

9.85 ἕπτ’ ἔσαν ἡγεμόνες φυλάκων , ἑκατὸν δὲ ἑκάστῳ

9.86 κοῦροι ἅμα στεῖχον δολίχ’ ἔγχεα χερσὶν ἔχοντες ·

9.87 κὰδ δὲ μέσον τάφρου καὶ τείχεος ἷζον ἰόντες ·

9.88 ἔνθα δὲ πῦρ κήαντο , τίθεντο δὲ δόρπα ἕκαστος .

9.89 Ἀτρεΐδης δὲ γέροντας ἀολλέας ἦγεν Ἀχαιῶν

9.90 ἐς κλισίην , παρὰ δέ σφι τίθει μενοεικέα δαῖτα .

9.91 οἳ δ’ ἐπ’ ὀνείαθ’ ἑτοῖμα προκείμενα χεῖρας ἴαλλον .