Greek Reader — The Homeric Iliad (7.156

7.156 πολλὸς γάρ τις ἔκειτο παρήορος ἔνθα καὶ ἔνθα .

7.157 εἴθ’ ὣς ἡβώοιμι , βίη δέ μοι ἔμπεδος εἴη ·

7.158 τώ κε τάχ’ ἀντήσειε μάχης κορυθαίολος Ἕκτωρ .

7.159 ὑμέων δ’ οἵ περ ἔασιν ἀριστῆες Παναχαιῶν

7.160 οὐδ’ οἳ προφρονέως μέμαθ’ Ἕκτορος ἀντίον ἐλθεῖν .

7.161 ὣς νείκεσσ’ ὃ γέρων , οἳ δ’ ἐννέα πάντες ἀνέσταν .

7.162 ὦρτο πολὺ πρῶτος μὲν ἄναξ ἀνδρῶν Ἀγαμέμνων ,

7.163 τῷ δ’ ἐπὶ Τυδεΐδης ὦρτο κρατερὸς Διομήδης ,

7.164 τοῖσι δ’ ἐπ’ Αἴαντες θοῦριν ἐπιειμένοι ἀλκήν ,

7.165 τοῖσι δ’ ἐπ’ Ἰδομενεὺς καὶ ὀπάων Ἰδομενῆος

7.166 Μηριόνης ἀτάλαντος Ἐνυαλίῳ ἀνδρειφόντῃ ,

7.167 τοῖσι δ’ ἐπ’ Εὐρύπυλος Εὐαίμονος ἀγλαὸς υἱός ,

7.168 ἂν δὲ Θόας Ἀνδραιμονίδης καὶ δῖος Ὀδυσσεύς ·

7.169 πάντες ἄρ’ οἵ γ’ ἔθελον πολεμίζειν Ἕκτορι δίῳ .

7.170 τοῖς δ’ αὖτις μετέειπε Γερήνιος ἱππότα Νέστωρ ·

7.171 κλήρῳ νῦν πεπάλασθε διαμπερὲς ὅς κε λάχῃσιν ·

7.172 οὗτος γὰρ δὴ ὀνήσει ἐϋκνήμιδας Ἀχαιούς ,

7.173 καὶ δ’ αὐτὸς ὃν θυμὸν ὀνήσεται αἴ κε φύγῃσι

7.174 δηΐου ἐκ πολέμοιο καὶ αἰνῆς δηϊοτῆτος .

7.175 ὣς ἔφαθ’ , οἳ δὲ κλῆρον ἐσημήναντο ἕκαστος ,

7.176 ἐν δ’ ἔβαλον κυνέῃ Ἀγαμέμνονος Ἀτρεΐδαο .

7.177 λαοὶ δ’ ἠρήσαντο , θεοῖσι δὲ χεῖρας ἀνέσχον ·

7.178 ὧδε δέ τις εἴπεσκεν ἰδὼν εἰς οὐρανὸν εὐρύν ·

7.179 Ζεῦ πάτερ ἢ Αἴαντα λαχεῖν , ἢ Τυδέος υἱόν ,

7.180 ἢ αὐτὸν βασιλῆα πολυχρύσοιο Μυκήνης .

7.181 ὣς ἄρ’ ἔφαν , πάλλεν δὲ Γερήνιος ἱππότα Νέστωρ ,

7.182 ἐκ δ’ ἔθορε κλῆρος κυνέης ὃν ἄρ’ ἤθελον αὐτοὶ

7.183 Αἴαντος · κῆρυξ δὲ φέρων ἀν’ ὅμιλον ἁπάντῃ

7.184 δεῖξ’ ἐνδέξια πᾶσιν ἀριστήεσσιν Ἀχαιῶν .

7.185 οἳ δ’ οὐ γιγνώσκοντες ἀπηνήναντο ἕκαστος .