Greek Reader — The Homeric Iliad (5.860

5.860 ὅσσόν τ’ ἐννεάχιλοι ἐπίαχον ἢ δεκάχιλοι

5.861 ἀνέρες ἐν πολέμῳ ἔριδα ξυνάγοντες Ἄρηος .

5.862 τοὺς δ’ ἄρ’ ὑπὸ τρόμος εἷλεν Ἀχαιούς τε Τρῶάς τε

5.863 δείσαντας · τόσον ἔβραχ’ Ἄρης ἆτος πολέμοιο .

5.864 οἵη δ’ ἐκ νεφέων ἐρεβεννὴ φαίνεται ἀὴρ

5.865 καύματος ἐξ ἀνέμοιο δυσαέος ὀρνυμένοιο ,

5.866 τοῖος Τυδεΐδῃ Διομήδεϊ χάλκεος Ἄρης

5.867 φαίνεθ’ ὁμοῦ νεφέεσσιν ἰὼν εἰς οὐρανὸν εὐρύν .

5.868 καρπαλίμως δ’ ἵκανε θεῶν ἕδος αἰπὺν Ὄλυμπον ,

5.869 πὰρ δὲ Διὶ Κρονίωνι καθέζετο θυμὸν ἀχεύων ,

5.870 δεῖξεν δ’ ἄμβροτον αἷμα καταρρέον ἐξ ὠτειλῆς ,

5.871 καί ῥ’ ὀλοφυρόμενος ἔπεα πτερόεντα προσηύδα ·

5.872 Ζεῦ πάτερ οὐ νεμεσίζῃ ὁρῶν τάδε καρτερὰ ἔργα ;

5.873 αἰεί τοι ῥίγιστα θεοὶ τετληότες εἰμὲν

5.874 ἀλλήλων ἰότητι , χάριν ἄνδρεσσι φέροντες .

5.875 σοὶ πάντες μαχόμεσθα · σὺ γὰρ τέκες ἄφρονα κούρην

5.876 οὐλομένην , ᾗ τ’ αἰὲν ἀήσυλα ἔργα μέμηλεν .

5.877 ἄλλοι μὲν γὰρ πάντες ὅσοι θεοί εἰσ’ ἐν Ὀλύμπῳ

5.878 σοί τ’ ἐπιπείθονται καὶ δεδμήμεσθα ἕκαστος ·

5.879 ταύτην δ’ οὔτ’ ἔπεϊ προτιβάλλεαι οὔτέ τι ἔργῳ ,

5.880 ἀλλ’ ἀνιεῖς , ἐπεὶ αὐτὸς ἐγείναο παῖδ’ ἀΐδηλον ·

5.881 ἣ νῦν Τυδέος υἱὸν ὑπερφίαλον Διομήδεα

5.882 μαργαίνειν ἀνέηκεν ἐπ’ ἀθανάτοισι θεοῖσι .

5.883 Κύπριδα μὲν πρῶτον σχεδὸν οὔτασε χεῖρ’ ἐπὶ καρπῷ ,

5.884 αὐτὰρ ἔπειτ’ αὐτῷ μοι ἐπέσσυτο δαίμονι ἶσος ·

5.885 ἀλλά μ’ ὑπήνεικαν ταχέες πόδες · ἦ τέ κε δηρὸν

5.886 αὐτοῦ πήματ’ ἔπασχον ἐν αἰνῇσιν νεκάδεσσιν ,

5.887 ἤ κε ζὼς ἀμενηνὸς ἔα χαλκοῖο τυπῇσι .

5.888 τὸν δ’ ἄρ’ ὑπόδρα ἰδὼν προσέφη νεφεληγερέτα Ζεύς .

5.889 μή τί μοι ἀλλοπρόσαλλε παρεζόμενος μινύριζε .

5.890 ἔχθιστος δέ μοί ἐσσι θεῶν οἳ Ὄλυμπον ἔχουσιν ·