Greek Reader — The Homeric Iliad (5.610

5.610 τὼ δὲ πεσόντ’ ἐλέησε μέγας Τελαμώνιος Αἴας ·

5.611 στῆ δὲ μάλ’ ἐγγὺς ἰών , καὶ ἀκόντισε δουρὶ φαεινῷ ,

5.612 καὶ βάλεν Ἄμφιον Σελάγου υἱόν , ὅς ῥ’ ἐνὶ Παισῷ

5.613 ναῖε πολυκτήμων πολυλήϊος · ἀλλά ἑ μοῖρα

5.614 ἦγ’ ἐπικουρήσοντα μετὰ Πρίαμόν τε καὶ υἷας .

5.615 τόν ῥα κατὰ ζωστῆρα βάλεν Τελαμώνιος Αἴας ,

5.616 νειαίρῃ δ’ ἐν γαστρὶ πάγη δολιχόσκιον ἔγχος ,

5.617 δούπησεν δὲ πεσών · ὃ δ’ ἐπέδραμε φαίδιμος Αἴας

5.618 τεύχεα συλήσων · Τρῶες δ’ ἐπὶ δούρατ’ ἔχευαν

5.619 ὀξέα παμφανόωντα · σάκος δ’ ἀνεδέξατο πολλά .

5.620 αὐτὰρ ὃ λὰξ προσβὰς ἐκ νεκροῦ χάλκεον ἔγχος

5.621 ἐσπάσατ’ · οὐδ’ ἄρ’ ἔτ’ ἄλλα δυνήσατο τεύχεα καλὰ

5.622 ὤμοιιν ἀφελέσθαι · ἐπείγετο γὰρ βελέεσσι .

5.623 δεῖσε δ’ ὅ γ’ ἀμφίβασιν κρατερὴν Τρώων ἀγερώχων ,

5.624 οἳ πολλοί τε καὶ ἐσθλοὶ ἐφέστασαν ἔγχε’ ἔχοντες ,

5.625 οἵ ἑ μέγαν περ ἐόντα καὶ ἴφθιμον καὶ ἀγαυὸν

5.626 ὦσαν ἀπὸ σφείων · ὃ δὲ χασσάμενος πελεμίχθη .

5.627 ὣς οἳ μὲν πονέοντο κατὰ κρατερὴν ὑσμίνην ·

5.628 Τληπόλεμον δ’ Ἡρακλεΐδην ἠΰν τε μέγαν τε

5.629 ὦρσεν ἐπ’ ἀντιθέῳ Σαρπηδόνι μοῖρα κραταιή .

5.630 οἳ δ’ ὅτε δὴ σχεδὸν ἦσαν ἐπ’ ἀλλήλοισιν ἰόντες

5.631 υἱός θ’ υἱωνός τε Διὸς νεφεληγερέταο ,

5.632 τὸν καὶ Τληπόλεμος πρότερος πρὸς μῦθον ἔειπε ·

5.633 Σαρπῆδον Λυκίων βουληφόρε , τίς τοι ἀνάγκη

5.634 πτώσσειν ἐνθάδ’ ἐόντι μάχης ἀδαήμονι φωτί ;

5.635 ψευδόμενοι δέ σέ φασι Διὸς γόνον αἰγιόχοιο

5.636 εἶναι , ἐπεὶ πολλὸν κείνων ἐπιδεύεαι ἀνδρῶν

5.637 οἳ Διὸς ἐξεγένοντο ἐπὶ προτέρων ἀνθρώπων ·

5.638 ἀλλ’ οἷόν τινά φασι βίην Ἡρακληείην

5.639 εἶναι , ἐμὸν πατέρα θρασυμέμνονα θυμολέοντα ·

5.640 ὅς ποτε δεῦρ’ ἐλθὼν ἕνεχ’ ἵππων Λαομέδοντος