Greek Reader — The Homeric Iliad (5.94

5.94 Τρώων , οὐδ’ ἄρα μιν μίμνον πολέες περ ἐόντες .

5.95 τὸν δ’ ὡς οὖν ἐνόησε Λυκάονος ἀγλαὸς υἱὸς

5.96 θύνοντ’ ἂμ πεδίον πρὸ ἕθεν κλονέοντα φάλαγγας ,

5.97 αἶψ’ ἐπὶ Τυδεΐδῃ ἐτιταίνετο καμπύλα τόξα ,

5.98 καὶ βάλ’ ἐπαΐσσοντα τυχὼν κατὰ δεξιὸν ὦμον

5.99 θώρηκος γύαλον · διὰ δ’ ἔπτατο πικρὸς ὀϊστός ,

5.100 ἀντικρὺ δὲ διέσχε , παλάσσετο δ’ αἵματι θώρηξ .

5.101 τῷ δ’ ἐπὶ μακρὸν ἄϋσε Λυκάονος ἀγλαὸς υἱός ·

5.102 ὄρνυσθε Τρῶες μεγάθυμοι κέντορες ἵππων ·

5.103 βέβληται γὰρ ἄριστος Ἀχαιῶν , οὐδέ ἕ φημι

5.104 δήθ’ ἀνσχήσεσθαι κρατερὸν βέλος , εἰ ἐτεόν με

5.105 ὦρσεν ἄναξ Διὸς υἱὸς ἀπορνύμενον Λυκίηθεν .

5.106 ὣς ἔφατ’ εὐχόμενος · τὸν δ’ οὐ βέλος ὠκὺ δάμασσεν ,

5.107 ἀλλ’ ἀναχωρήσας πρόσθ’ ἵπποιιν καὶ ὄχεσφιν

5.108 ἔστη , καὶ Σθένελον προσέφη Καπανήϊον υἱόν ·

5.109 ὄρσο πέπον Καπανηϊάδη , καταβήσεο δίφρου ,

5.110 ὄφρά μοι ἐξ ὤμοιο ἐρύσσῃς πικρὸν ὀϊστόν .

5.111 ὣς ἄρ’ ἔφη , Σθένελος δὲ καθ’ ἵππων ἆλτο χαμᾶζε ,

5.112 πὰρ δὲ στὰς βέλος ὠκὺ διαμπερὲς ἐξέρυσ’ ὤμου ·

5.113 αἷμα δ’ ἀνηκόντιζε διὰ στρεπτοῖο χιτῶνος .

5.114 δὴ τότ’ ἔπειτ’ ἠρᾶτο βοὴν ἀγαθὸς Διομήδης ·

5.115 κλῦθί μευ αἰγιόχοιο Διὸς τέκος Ἀτρυτώνη ,

5.116 εἴ ποτέ μοι καὶ πατρὶ φίλα φρονέουσα παρέστης

5.117 δηΐῳ ἐν πολέμῳ , νῦν αὖτ’ ἐμὲ φῖλαι Ἀθήνη ·

5.118 δὸς δέ τέ μ’ ἄνδρα ἑλεῖν καὶ ἐς ὁρμὴν ἔγχεος ἐλθεῖν

5.119 ὅς μ’ ἔβαλε φθάμενος καὶ ἐπεύχεται , οὐδέ μέ φησι

5.120 δηρὸν ἔτ’ ὄψεσθαι λαμπρὸν φάος ἠελίοιο .

5.121 ὣς ἔφατ’ εὐχόμενος · τοῦ δ’ ἔκλυε Παλλὰς Ἀθήνη ,

5.122 γυῖα δ’ ἔθηκεν ἐλαφρά , πόδας καὶ χεῖρας ὕπερθεν ·