Greek Reader — The Homeric Iliad (2.497

2.497 Σχοῖνόν τε Σκῶλόν τε πολύκνημόν τ’ Ἐτεωνόν ,

2.498 Θέσπειαν Γραῖάν τε καὶ εὐρύχορον Μυκαλησσόν ,

2.499 οἵ τ’ ἀμφ’ Ἅρμ’ ἐνέμοντο καὶ Εἰλέσιον καὶ Ἐρυθράς ,

2.500 οἵ τ’ Ἐλεῶν’ εἶχον ἠδ’ Ὕλην καὶ Πετεῶνα ,

2.501 Ὠκαλέην Μεδεῶνά τ’ ἐϋκτίμενον πτολίεθρον ,

2.502 Κώπας Εὔτρησίν τε πολυτρήρωνά τε Θίσβην ,

2.503 οἵ τε Κορώνειαν καὶ ποιήενθ’ Ἁλίαρτον ,

2.504 οἵ τε Πλάταιαν ἔχον ἠδ’ οἳ Γλισᾶντ’ ἐνέμοντο ,

2.505 οἵ θ’ Ὑποθήβας εἶχον ἐϋκτίμενον πτολίεθρον ,

2.506 Ὀγχηστόν θ’ ἱερὸν Ποσιδήϊον ἀγλαὸν ἄλσος ,

2.507 οἵ τε πολυστάφυλον Ἄρνην ἔχον , οἵ τε Μίδειαν

2.508 Νῖσάν τε ζαθέην Ἀνθηδόνα τ’ ἐσχατόωσαν ·

2.509 τῶν μὲν πεντήκοντα νέες κίον , ἐν δὲ ἑκάστῃ

2.510 κοῦροι Βοιωτῶν ἑκατὸν καὶ εἴκοσι βαῖνον .

2.511 οἳ δ’ Ἀσπληδόνα ναῖον ἰδ’ Ὀρχομενὸν Μινύειον ,

2.512 τῶν ἦρχ’ Ἀσκάλαφος καὶ Ἰάλμενος υἷες Ἄρηος

2.513 οὓς τέκεν Ἀστυόχη δόμῳ Ἄκτορος Ἀζεΐδαο ,

2.514 παρθένος αἰδοίη ὑπερώϊον εἰσαναβᾶσα

2.515 Ἄρηϊ κρατερῷ · ὃ δέ οἱ παρελέξατο λάθρῃ ·

2.516 τοῖς δὲ τριήκοντα γλαφυραὶ νέες ἐστιχόωντο .

2.517 αὐτὰρ Φωκήων Σχεδίος καὶ Ἐπίστροφος ἦρχον

2.518 υἷες Ἰφίτου μεγαθύμου Ναυβολίδαο ,

2.519 οἳ Κυπάρισσον ἔχον Πυθῶνά τε πετρήεσσαν

2.520 Κρῖσάν τε ζαθέην καὶ Δαυλίδα καὶ Πανοπῆα ,

2.521 οἵ τ’ Ἀνεμώρειαν καὶ Ὑάμπολιν ἀμφενέμοντο ,

2.522 οἵ τ’ ἄρα πὰρ ποταμὸν Κηφισὸν δῖον ἔναιον ,

2.523 οἵ τε Λίλαιαν ἔχον πηγῇς ἔπι Κηφισοῖο ·

2.524 τοῖς δ’ ἅμα τεσσαράκοντα μέλαιναι νῆες ἕποντο .

2.525 οἳ μὲν Φωκήων στίχας ἵστασαν ἀμφιέποντες ,

2.526 Βοιωτῶν δ’ ἔμπλην ἐπ’ ἀριστερὰ θωρήσσοντο .

2.527 Λοκρῶν δ’ ἡγεμόνευεν Ὀϊλῆος ταχὺς Αἴας

2.528 μείων , οὔ τι τόσος γε ὅσος Τελαμώνιος Αἴας

2.529 ἀλλὰ πολὺ μείων · ὀλίγος μὲν ἔην λινοθώρηξ ,