Greek Reader — The Homeric Iliad (2.399

2.399 κάπνισσάν τε κατὰ κλισίας , καὶ δεῖπνον ἕλοντο .

2.400 ἄλλος δ’ ἄλλῳ ἔρεζε θεῶν αἰειγενετάων

2.401 εὐχόμενος θάνατόν τε φυγεῖν καὶ μῶλον Ἄρηος .

2.402 αὐτὰρ ὃ βοῦν ἱέρευσε ἄναξ ἀνδρῶν Ἀγαμέμνων

2.403 πίονα πενταέτηρον ὑπερμενέϊ Κρονίωνι ,

2.404 κίκλησκεν δὲ γέροντας ἀριστῆας Παναχαιῶν ,

2.405 Νέστορα μὲν πρώτιστα καὶ Ἰδομενῆα ἄνακτα ,

2.406 αὐτὰρ ἔπειτ’ Αἴαντε δύω καὶ Τυδέος υἱόν ,

2.407 ἕκτον δ’ αὖτ’ Ὀδυσῆα Διὶ μῆτιν ἀτάλαντον .

2.408 αὐτόματος δέ οἱ ἦλθε βοὴν ἀγαθὸς Μενέλαος ·

2.409 ᾔδεε γὰρ κατὰ θυμὸν ἀδελφεὸν ὡς ἐπονεῖτο .

2.410 βοῦν δὲ περιστήσαντο καὶ οὐλοχύτας ἀνέλοντο ·

2.411 τοῖσιν δ’ εὐχόμενος μετέφη κρείων Ἀγαμέμνων ·

2.412 Ζεῦ κύδιστε μέγιστε κελαινεφὲς αἰθέρι ναίων

2.413 μὴ πρὶν ἐπ’ ἠέλιον δῦναι καὶ ἐπὶ κνέφας ἐλθεῖν

2.414 πρίν με κατὰ πρηνὲς βαλέειν Πριάμοιο μέλαθρον

2.415 αἰθαλόεν , πρῆσαι δὲ πυρὸς δηΐοιο θύρετρα ,

2.416 Ἑκτόρεον δὲ χιτῶνα περὶ στήθεσσι δαΐξαι

2.417 χαλκῷ ῥωγαλέον · πολέες δ’ ἀμφ’ αὐτὸν ἑταῖροι

2.418 πρηνέες ἐν κονίῃσιν ὀδὰξ λαζοίατο γαῖαν .

2.419 ὣς ἔφατ’ , οὐδ’ ἄρα πώ οἱ ἐπεκραίαινε Κρονίων ,

2.420 ἀλλ’ ὅ γε δέκτο μὲν ἱρά , πόνον δ’ ἀμέγαρτον ὄφελλεν .

2.421 αὐτὰρ ἐπεί ῥ’ εὔξαντο καὶ οὐλοχύτας προβάλοντο ,

2.422 αὐέρυσαν μὲν πρῶτα καὶ ἔσφαξαν καὶ ἔδειραν ,

2.423 μηρούς τ’ ἐξέταμον κατά τε κνίσῃ ἐκάλυψαν

2.424 δίπτυχα ποιήσαντες , ἐπ’ αὐτῶν δ’ ὠμοθέτησαν .

2.425 καὶ τὰ μὲν ἂρ σχίζῃσιν ἀφύλλοισιν κατέκαιον ,

2.426 σπλάγχνα δ’ ἄρ’ ἀμπείραντες ὑπείρεχον Ἡφαίστοιο .

2.427 αὐτὰρ ἐπεὶ κατὰ μῆρε κάη καὶ σπλάγχνα πάσαντο ,

2.428 μίστυλλόν τ’ ἄρα τἆλλα καὶ ἀμφ’ ὀβελοῖσιν ἔπειραν ,

2.429 ὤπτησάν τε περιφραδέως , ἐρύσαντό τε πάντα .

2.430 αὐτὰρ ἐπεὶ παύσαντο πόνου τετύκοντό τε δαῖτα