Greek Reader — The Homeric Iliad (2.92

2.92 ἠϊόνος προπάροιθε βαθείης ἐστιχόωντο

2.93 ἰλαδὸν εἰς ἀγορήν · μετὰ δέ σφισιν ὄσσα δεδήει

2.94 ὀτρύνουσ’ ἰέναι Διὸς ἄγγελος · οἳ δ’ ἀγέροντο .

2.95 τετρήχει δ’ ἀγορή , ὑπὸ δὲ στεναχίζετο γαῖα

2.96 λαῶν ἱζόντων , ὅμαδος δ’ ἦν · ἐννέα δέ σφεας

2.97 κήρυκες βοόωντες ἐρήτυον , εἴ ποτ’ ἀϋτῆς

2.98 σχοίατ’ , ἀκούσειαν δὲ διοτρεφέων βασιλήων .

2.99 σπουδῇ δ’ ἕζετο λαός , ἐρήτυθεν δὲ καθ’ ἕδρας

2.100 παυσάμενοι κλαγγῆς · ἀνὰ δὲ κρείων Ἀγαμέμνων

2.101 ἔστη σκῆπτρον ἔχων τὸ μὲν Ἥφαιστος κάμε τεύχων .

2.102 Ἥφαιστος μὲν δῶκε Διὶ Κρονίωνι ἄνακτι ,

2.103 αὐτὰρ ἄρα Ζεὺς δῶκε διακτόρῳ ἀργεϊφόντῃ ·

2.104 Ἑρμείας δὲ ἄναξ δῶκεν Πέλοπι πληξίππῳ ,

2.105 αὐτὰρ ὃ αὖτε Πέλοψ δῶκ’ Ἀτρέϊ ποιμένι λαῶν ,

2.106 Ἀτρεὺς δὲ θνῄσκων ἔλιπεν πολύαρνι Θυέστῃ ,

2.107 αὐτὰρ ὃ αὖτε Θυέστ’ Ἀγαμέμνονι λεῖπε φορῆναι ,

2.108 πολλῇσιν νήσοισι καὶ Ἄργεϊ παντὶ ἀνάσσειν .

2.109 τῷ ὅ γ’ ἐρεισάμενος ἔπε’ Ἀργείοισι μετηύδα ·

2.110 ὦ φίλοι ἥρωες Δαναοὶ θεράποντες Ἄρηος

2.111 Ζεύς με μέγα Κρονίδης ἄτῃ ἐνέδησε βαρείῃ ,

2.112 σχέτλιος , ὃς πρὶν μέν μοι ὑπέσχετο καὶ κατένευσεν

2.113 Ἴλιον ἐκπέρσαντ’ εὐτείχεον ἀπονέεσθαι ,

2.114 νῦν δὲ κακὴν ἀπάτην βουλεύσατο , καί με κελεύει

2.115 δυσκλέα Ἄργος ἱκέσθαι , ἐπεὶ πολὺν ὤλεσα λαόν .

2.116 οὕτω που Διὶ μέλλει ὑπερμενέϊ φίλον εἶναι ,

2.117 ὃς δὴ πολλάων πολίων κατέλυσε κάρηνα

2.118 ἠδ’ ἔτι καὶ λύσει · τοῦ γὰρ κράτος ἐστὶ μέγιστον .

2.119 αἰσχρὸν γὰρ τόδε γ’ ἐστὶ καὶ ἐσσομένοισι πυθέσθαι

2.120 μὰψ οὕτω τοιόνδε τοσόνδε τε λαὸν Ἀχαιῶν

2.121 ἄπρηκτον πόλεμον πολεμίζειν ἠδὲ μάχεσθαι

2.122 ἀνδράσι παυροτέροισι , τέλος δ’ οὔ πώ τι πέφανται ·

2.123 εἴ περ γάρ κ’ ἐθέλοιμεν Ἀχαιοί τε Τρῶές τε