Greek Reader — The Homeric Iliad (1.464

1.464 αὐτὰρ ἐπεὶ κατὰ μῆρε κάη καὶ σπλάγχνα πάσαντο ,

1.465 μίστυλλόν τ’ ἄρα τἆλλα καὶ ἀμφ’ ὀβελοῖσιν ἔπειραν ,

1.466 ὤπτησάν τε περιφραδέως , ἐρύσαντό τε πάντα .

1.467 αὐτὰρ ἐπεὶ παύσαντο πόνου τετύκοντό τε δαῖτα

1.468 δαίνυντ’ , οὐδέ τι θυμὸς ἐδεύετο δαιτὸς ἐΐσης .

1.469 αὐτὰρ ἐπεὶ πόσιος καὶ ἐδητύος ἐξ ἔρον ἕντο ,

1.470 κοῦροι μὲν κρητῆρας ἐπεστέψαντο ποτοῖο ,

1.471 νώμησαν δ’ ἄρα πᾶσιν ἐπαρξάμενοι δεπάεσσιν ·

1.472 οἳ δὲ πανημέριοι μολπῇ θεὸν ἱλάσκοντο

1.473 καλὸν ἀείδοντες παιήονα κοῦροι Ἀχαιῶν

1.474 μέλποντες ἑκάεργον · ὃ δὲ φρένα τέρπετ’ ἀκούων .

1.475 ἦμος δ’ ἠέλιος κατέδυ καὶ ἐπὶ κνέφας ἦλθε ,

1.476 δὴ τότε κοιμήσαντο παρὰ πρυμνήσια νηός ·

1.477 ἦμος δ’ ἠριγένεια φάνη ῥοδοδάκτυλος Ἠώς ,

1.478 καὶ τότ’ ἔπειτ’ ἀνάγοντο μετὰ στρατὸν εὐρὺν Ἀχαιῶν ·

1.479 τοῖσιν δ’ ἴκμενον οὖρον ἵει ἑκάεργος Ἀπόλλων ·

1.480 οἳ δ’ ἱστὸν στήσαντ’ ἀνά θ’ ἱστία λευκὰ πέτασσαν ,

1.481 ἐν δ’ ἄνεμος πρῆσεν μέσον ἱστίον , ἀμφὶ δὲ κῦμα

1.482 στείρῃ πορφύρεον μεγάλ’ ἴαχε νηὸς ἰούσης ·

1.483 ἣ δ’ ἔθεεν κατὰ κῦμα διαπρήσσουσα κέλευθον .

1.484 αὐτὰρ ἐπεί ῥ’ ἵκοντο κατὰ στρατὸν εὐρὺν Ἀχαιῶν ,

1.485 νῆα μὲν οἵ γε μέλαιναν ἐπ’ ἠπείροιο ἔρυσσαν

1.486 ὑψοῦ ἐπὶ ψαμάθοις , ὑπὸ δ’ ἕρματα μακρὰ τάνυσσαν ·

1.487 αὐτοὶ δ’ ἐσκίδναντο κατὰ κλισίας τε νέας τε .

1.488 αὐτὰρ ὃ μήνιε νηυσὶ παρήμενος ὠκυπόροισι

1.489 διογενὴς Πηλῆος υἱὸς πόδας ὠκὺς Ἀχιλλεύς ·

1.490 οὔτέ ποτ’ εἰς ἀγορὴν πωλέσκετο κυδιάνειραν

1.491 οὔτέ ποτ’ ἐς πόλεμον , ἀλλὰ φθινύθεσκε φίλον κῆρ

1.492 αὖθι μένων , ποθέεσκε δ’ ἀϋτήν τε πτόλεμόν τε .

1.493 ἀλλ’ ὅτε δή ῥ’ ἐκ τοῖο δυωδεκάτη γένετ’ ἠώς ,