Greek Reader — The Homeric Iliad (1.176

1.176 ἔχθιστος δέ μοί ἐσσι διοτρεφέων βασιλήων ·

1.177 αἰεὶ γάρ τοι ἔρις τε φίλη πόλεμοί τε μάχαι τε ·

1.178 εἰ μάλα καρτερός ἐσσι , θεός που σοὶ τό γ’ ἔδωκεν ·

1.179 οἴκαδ’ ἰὼν σὺν νηυσί τε σῇς καὶ σοῖς ἑτάροισι

1.180 Μυρμιδόνεσσιν ἄνασσε , σέθεν δ’ ἐγὼ οὐκ ἀλεγίζω ,

1.181 οὐδ’ ὄθομαι κοτέοντος · ἀπειλήσω δέ τοι ὧδε ·

1.182 ὡς ἔμ’ ἀφαιρεῖται Χρυσηΐδα Φοῖβος Ἀπόλλων ,

1.183 τὴν μὲν ἐγὼ σὺν νηΐ τ’ ἐμῇ καὶ ἐμοῖς ἑτάροισι

1.184 πέμψω , ἐγὼ δέ κ’ ἄγω Βρισηΐδα καλλιπάρῃον

1.185 αὐτὸς ἰὼν κλισίην δὲ τὸ σὸν γέρας ὄφρ’ ἐῢ εἰδῇς

1.186 ὅσσον φέρτερός εἰμι σέθεν , στυγέῃ δὲ καὶ ἄλλος

1.187 ἶσον ἐμοὶ φάσθαι καὶ ὁμοιωθήμεναι ἄντην .

1.188 ὣς φάτο · Πηλεΐωνι δ’ ἄχος γένετ’ , ἐν δέ οἱ ἦτορ

1.189 στήθεσσιν λασίοισι διάνδιχα μερμήριξεν ,

1.190 ἢ ὅ γε φάσγανον ὀξὺ ἐρυσσάμενος παρὰ μηροῦ

1.191 τοὺς μὲν ἀναστήσειεν , ὃ δ’ Ἀτρεΐδην ἐναρίζοι ,

1.192 ἦε χόλον παύσειεν ἐρητύσειέ τε θυμόν .

1.193 ἧος ὃ ταῦθ’ ὥρμαινε κατὰ φρένα καὶ κατὰ θυμόν ,

1.194 ἕλκετο δ’ ἐκ κολεοῖο μέγα ξίφος , ἦλθε δ’ Ἀθήνη

1.195 οὐρανόθεν · πρὸ γὰρ ἧκε θεὰ λευκώλενος Ἥρη

1.196 ἄμφω ὁμῶς θυμῷ φιλέουσά τε κηδομένη τε ·

1.197 στῆ δ’ ὄπιθεν , ξανθῆς δὲ κόμης ἕλε Πηλεΐωνα

1.198 οἴῳ φαινομένη · τῶν δ’ ἄλλων οὔ τις ὁρᾶτο ·

1.199 θάμβησεν δ’ Ἀχιλεύς , μετὰ δ’ ἐτράπετ’ , αὐτίκα δ’ ἔγνω

1.200 Παλλάδ’ Ἀθηναίην · δεινὼ δέ οἱ ὄσσε φάανθεν ·

1.201 καί μιν φωνήσας ἔπεα πτερόεντα προσηύδα ·

1.202 τίπτ’ αὖτ’ αἰγιόχοιο Διὸς τέκος εἰλήλουθας ;

1.203 ἦ ἵνα ὕβριν ἴδῃ Ἀγαμέμνονος Ἀτρεΐδαο ;