Greek Reader — Aristophanes Lysistrata (1136–1161)

Aristophanes Lysistrata 1136–1161

Ἀθηναῖος

1136 ἐγὼ δ’ ἀπόλλυμαί γ’ ἀπεψωλημένος .

Λυσιστράτη

1137 εἶτ’ ὦ Λάκωνες , πρὸς γὰρ ὑμᾶς τρέψομαι ,

1138 οὐκ ἴσθ’ ὅτ’ ἐλθὼν δεῦρο Περικλείδας ποτὲ

1139 ὁ Λάκων Ἀθηναίων ἱκέτης καθέζετο

1140 ἐπὶ τοῖσι βωμοῖς ὠχρὸς ἐν φοινικίδι

1141 στρατιὰν προσαιτῶν ; ἡ δὲ Μεσσήνη τότε

1142 ὑμῖν ἐπέκειτο χὠ θεὸς σείων ἅμα .

1143 ἐλθὼν δὲ σὺν ὁπλίταισι τετρακισχιλίοις

1144 Κίμων ὅλην ἔσωσε τὴν Λακεδαίμονα .

1145 ταυτὶ παθόντες τῶν Ἀθηναίων ὕπο

1146 δῃοῦτε χώραν , ἧς ὑπ’ εὖ πεπόνθατε ;

Ἀθηναῖος

1147 ἀδικοῦσιν οὗτοι νὴ Δί’ ὦ Λυσιστράτη .

Λάκων

1148 ἀδικίομες · ἀλλ’ ὁ πρωκτὸς ἄφατον ὡς καλός .

Λυσιστράτη

1149 ὑμᾶς δ’ ἀφήσειν τοὺς Ἀθηναίους μ’ οἴει ;

1150 οὐκ ἴσθ’ ὅθ’ ὑμᾶς οἱ Λάκωνες αὖθις αὖ

1151 κατωνάκας φοροῦντας ἐλθόντες δορὶ

1152 πολλοὺς μὲν ἄνδρας Θετταλῶν ἀπώλεσαν ,

1153 πολλοὺς δ’ ἑταίρους Ἱππίου καὶ ξυμμάχους ,

1154 ξυνεκμαχοῦντες τῇ τόθ’ ἡμέρᾳ μόνοι ,

1155 κἠλευθέρωσαν κἀντὶ τῆς κατωνάκης

1156 τὸν δῆμον ὑμῶν χλαῖναν ἠμπέσχον πάλιν ;

Λάκων

1157 οὔπα γυναῖκ’ ὄπωπα χαϊωτεραν .

Ἀθηναῖος

1158 ἐγὼ δὲ κύσθον γ’ οὐδέπω καλλίονα .

Λυσιστράτη

1159 τί δῆθ’ υπηργμένων γε πολλῶν κἀγαθῶν

1160 μάχεσθε κοὐ παύεσθε τῆς μοχθηρίας ;

1161 τί δ’ οὐ διηλλάγητε ; φέρε τί τοὐμποδών ;