Greek Reader — Aristophanes Lysistrata (21–41)

Aristophanes Lysistrata 21–41

Λυσιστράτη

21 αὐταῖς .

Καλονίκη

τί δ’ ἐστὶν ὦ φίλη Λυσιστράτη ,

22 ἐφ’ ὅ τι ποθ’ ἡμᾶς τὰς γυναῖκας συγκαλεῖς ;

23 τί τὸ πρᾶγμα ; πηλίκον τι ;

Λυσιστράτη

μέγα .

Καλονίκη

μῶν καὶ παχύ ;

Λυσιστράτη

24 καὶ νὴ Δία παχύ .

Καλονίκη

κᾆτα πῶς οὐχ ἥκομεν ;

Λυσιστράτη

25 οὐχ οὗτος ὁ τρόπος · ταχὺ γὰρ ἂν ξυνήλθομεν .

26 ἀλλ’ ἔστιν ὑπ’ ἐμοῦ πρᾶγμ’ ἀνεζητημένον

27 πολλαῖσί τ’ ἀγρυπνίαισιν ἐρριπτασμένον .

Καλονίκη

28 ἦ πού τι λεπτόν ἐστι τοὐρριπτασμένον .

Λυσιστράτη

29 οὕτω γε λεπτὸν ὥσθ’ ὅλης τῆς Ἑλλάδος

30 ἐν ταῖς γυναιξίν ἐστιν ἡ σωτηρία .

Καλονίκη

31 ἐν ταῖς γυναιξίν ; ἐπ’ ὀλίγου γ’ ὠχεῖτ’ ἄρα .

Λυσιστράτη

32 ὡς ἔστ’ ἐν ἡμῖν τῆς πόλεως τὰ πράγματα ,

33 ἢ μηκέτ’ εἶναι μήτε Πελοποννησίους —

Καλονίκη

34 βέλτιστα τοίνυν μηκέτ’ εἶναι νὴ Δία .

Λυσιστράτη

35 Βοιωτίους τε πάντας ἐξολωλέναι .

Καλονίκη

36 μὴ δῆτα πάντας γ’ , ἀλλ’ ἄφελε τὰς ἐγχέλεις .

Λυσιστράτη

37 περὶ τῶν Ἀθηνῶν δ’ οὐκ ἐπιγλωττήσομαι

38 τοιοῦτον οὐδέν · ἀλλ’ ὑπονόησον σύ μοι .

39 ἢν δὲ ξυνέλθωσ’ αἱ γυναῖκες ἐνθάδε

40 αἵ τ’ ἐκ Βοιωτῶν αἵ τε Πελοποννησίων

41 ἡμεῖς τε , κοινῇ σώσομεν τὴν Ἑλλάδα .