Greek Reader — Sophocles Ajax (1226–1263)

Sophocles Ajax 1226–1263

Ἀγαμέμνων

1226 σὲ δὴ τὰ δεινὰ ῥήματ’ ἀγγέλλουσί μοι

1227 τλῆναι καθ’ ἡμῶν ὧδ’ ἀνοιμωκτὶ χανεῖν ;

1228 σέ τοι , τὸν ἐκ τῆς αἰχμαλωτίδος λέγω ,

1229 ἦ που τραφεὶς ἂν μητρὸς εὐγενοῦς ἄπο

1230 ὑψήλ’ ἐκόμπεις κἀπ’ ἄκρων ὡδοιπόρεις ,

1231 ὅτ’ οὐδὲν ὢν τοῦ μηδὲν ἀντέστης ὕπερ ,

1232 κοὔτε στρατηγοὺς οὔτε ναυάρχους μολεῖν

1233 ἡμᾶς Ἀχαιῶν οὐδὲ σοῦ διωμόσω

1234 ἀλλ’ αὐτὸς ἄρχων , ὡς σὺ φής , Αἴας ἔπλει .

1235 ταῦτ’ οὐκ ἀκούειν μεγάλα πρὸς δούλων κακά ;

1236 ποίου κέκραγας ἀνδρὸς ὧδ’ ὑπέρφρονα ;

1237 ποῖ βάντος ἢ ποῦ στάντος οὗπερ οὐκ ἐγώ ;

1238 οὐκ ἆρ’ Ἀχαιοῖς ἄνδρες εἰσὶ πλὴν ὅδε ;

1239 πικροὺς ἔοιγμεν τῶν Ἀχιλλείων ὅπλων

1240 ἀγῶνας Ἀργείοισι κηρῦξαι τότε ,

1241 εἰ πανταχοῦ φανούμεθ’ ἐκ Τεύκρου κακοί ,

1242 κοὐκ ἀρκέσει ποθ’ ὑμὶν οὐδ’ ἡσσημένοις

1243 εἴκειν ἃ τοῖς πολλοῖσιν ἤρεσκεν κριταῖς ,

1244 ἀλλ’ αἰὲν ἡμᾶς ἢ κακοῖς βαλεῖτέ που

1245 ἢ σὺν δόλῳ κεντήσεθ’ οἱ λελειμμένοι .

1246 ἐκ τῶνδε μέντοι τῶν τρόπων οὐκ ἄν ποτε

1247 κατάστασις γένοιτ’ ἂν οὐδενὸς νόμου ,

1248 εἰ τοὺς δίκῃ νικῶντας ἐξωθήσομεν

1249 καὶ τοὺς ὄπισθεν εἰς τὸ πρόσθεν ἄξομεν .

1250 ἀλλ’ εἰρκτέον τάδ’ ἐστίν · οὐ γὰρ οἱ πλατεῖς

1251 οὐδ’ εὐρύνωτοι φῶτες ἀσφαλέστατοι ,

1252 ἀλλ’ οἱ φρονοῦντες εὖ κρατοῦσι πανταχοῦ .

1253 μέγας δὲ πλευρὰ βοῦς ὑπὸ σμικρᾶς ὅμως

1254 μάστιγος ὀρθὸς εἰς ὁδὸν πορεύεται .

1255 καὶ σοὶ προσέρπον τοῦτ’ ἐγὼ τὸ φάρμακον

1256 ὁρῶ τάχ’ , εἰ μὴ νοῦν κατακτήσει τινά ·

1257 ὃς ἀνδρὸς οὐκέτ’ ὄντος , ἀλλ’ ἤδη σκιᾶς ,

1258 θαρσῶν ὑβρίζεις κἀξελευθεροστομεῖς .

1259 οὐ σωφρονήσεις ; οὐ μαθὼν ὃς εἶ φύσιν

1260 ἄλλον τιν’ ἄξεις ἄνδρα δεῦρ’ ἐλεύθερον ,

1261 ὅστις πρὸς ἡμᾶς ἀντὶ σοῦ λέξει τὰ σά ;

1262 σοῦ γὰρ λέγοντος οὐκέτ’ ἂν μάθοιμ’ ἐγώ ·

1263 τὴν βάρβαρον γὰρ γλῶσσαν οὐκ ἐπαΐω .