22.174 ἐς θάλαμον βαλέειν , σανίδας δʹ ἐκδῆσαι ὄπισθε ,
22.175 σειρὴν δὲ πλεκτὴν ἐξ αὐτοῦ πειρήναντε
22.176 κίονʹ ἀνʹ ὑψηλὴν ἐρύσαι πελάσαι τε δοκοῖσιν ,
22.177 ὥς κεν δηθὰ ζωὸς ἐὼν χαλέπʹ ἄλγεα πάσχῃ ·
22.178 ὣς ἔφαθʹ , οἱ δʹ ἄρα τοῦ μάλα μὲν κλύον ἠδʹ ἐπίθοντο ,
22.179 βὰν δʹ ἴμεν ἐς θάλαμον , λαθέτην δέ μιν ἔνδον ἐόντα .
22.180 ἦ τοι ὁ μὲν θαλάμοιο μυχὸν κάτα τεύχεʹ ἐρεύνα ,
22.181 τὼ δʹ ἔσταν ἑκάτερθε παρὰ σταθμοῖσι μένοντε .
22.182 εὖθʹ ὑπὲρ οὐδὸν ἔβαινε Μελάνθιος , αἰπόλος αἰγῶν ,
22.183 τῇ ἑτέρῃ μὲν χειρὶ φέρων καλὴν τρυφάλειαν ,
22.184 τῇ δʹ ἑτέρῃ σάκος εὐρὺ γέρον , πεπαλαγμένον ἄζῃ ,
22.185 Λαέρτεω ἥρωος , ὃ κουρίζων φορέεσκε ·
22.186 δὴ τότε γʹ ἤδη κεῖτο , ῥαφαὶ δὲ λέλυντο ἱμάντων ·
22.187 τὼ δʹ ἄρʹ ἐπαΐξανθʹ ἑλέτην ἔρυσάν τέ μιν εἴσω
22.188 κουρίξ , ἐν δαπέδῳ δὲ χαμαὶ βάλον ἀχνύμενον κῆρ ,
22.189 σὺν δὲ πόδας χεῖράς τε δέον θυμαλγέϊ δεσμῷ
22.190 εὖ μάλʹ ἀποστρέψαντε διαμπερές , ὡς ἐκέλευσεν
22.191 υἱὸς Λαέρταο , πολύτλας δῖος Ὀδυσσεύς ·
22.192 σειρὴν δὲ πλεκτὴν ἐξ αὐτοῦ πειρήναντε
22.193 κίονʹ ἀνʹ ὑψηλὴν ἔρυσαν πέλασάν τε δοκοῖσι .
22.194 τὸν δʹ ἐπικερτομέων προσέφης , Εὔμαιε συβῶτα ·
22.195 νῦν μὲν δὴ μάλα πάγχυ , Μελάνθιε , νύκτα φυλάξεις ,
22.196 εὐνῇ ἔνι μαλακῇ καταλέγμενος , ὥς σε ἔοικεν ·
22.197 οὐδέ σέ γʹ ἠριγένεια παρʹ Ὠκεανοῖο ῥοάων
22.198 λήσει ἐπερχομένη χρυσόθρονος , ἡνίκʹ ἀγινεῖς
22.199 αἶγας μνηστήρεσσι δόμον κάτα δαῖτα πένεσθαι .
22.200 ὣς ὁ μὲν αὖθι λέλειπτο , ταθεὶς ὀλοῷ ἐνὶ δεσμῷ ·
22.201 τὼ δʹ ἐς τεύχεα δύντε , θύρην ἐπιθέντε φαεινήν ,