19.147 αἴ κεν ἄτερ σπείρου κεῖται πολλὰ κτεατίσσας .
19.148 ὣς ἐφάμην , τοῖσιν δʹ ἐπεπείθετο θυμὸς ἀγήνωρ .
19.149 ἔνθα καὶ ἠματίη μὲν ὑφαίνεσκον μέγαν ἱστόν ,
19.150 νύκτας δʹ ἀλλύεσκον , ἐπεὶ δαΐδας παραθείμην .
19.151 ὣς τρίετες μὲν ἔληθον ἐγὼ καὶ ἔπειθον Ἀχαιούς ·
19.152 ἀλλʹ ὅτε τέτρατον ἦλθεν ἔτος καὶ ἐπήλυθον ὧραι ,
19.153 μηνῶν φθινόντων , περὶ δʹ ἤματα πόλλʹ ἐτελέσθη ,
19.154 καὶ τότε δή με διὰ δμῳάς , κύνας οὐκ ἀλεγούσας ,
19.155 εἷλον ἐπελθόντες καὶ ὁμόκλησαν ἐπέεσσιν .
19.156 ὣς τὸ μὲν ἐξετέλεσσα , καὶ οὐκ ἐθέλουσʹ , ὑπʹ ἀνάγκης ·
19.157 νῦν δʹ οὔτʹ ἐκφυγέειν δύναμαι γάμον οὔτε τινʹ ἄλλην
19.158 μῆτιν ἔθʹ εὑρίσκω · μάλα δʹ ὀτρύνουσι τοκῆες
19.159 γήμασθʹ , ἀσχαλάᾳ δὲ πάϊς βίοτον κατεδόντων ,
19.160 γιγνώσκων · ἤδη γὰρ ἀνὴρ οἶός τε μάλιστα
19.161 οἴκου κήδεσθαι , τῷ τε Ζεὺς κῦδος ὀπάζει .
19.162 ἀλλὰ καὶ ὥς μοι εἰπὲ τεὸν γένος , ὁππόθεν ἐσσί .
19.163 οὐ γὰρ ἀπὸ δρυός ἐσσι παλαιφάτου οὐδʹ ἀπὸ πέτρης .
19.164 τὴν δʹ ἀπαμειβόμενος προσέφη πολύμητις Ὀδυσσεύς ·
19.165 ὦ γύναι αἰδοίη Λαερτιάδεω Ὀδυσῆος ,
19.166 οὐκέτʹ ἀπολλήξεις τὸν ἐμὸν γόνον ἐξερέουσα ;
19.167 ἀλλʹ ἔκ τοι ἐρέω · ἦ μέν μʹ ἀχέεσσί γε δώσεις
19.168 πλείοσιν ἢ ἔχομαι · ἡ γὰρ δίκη , ὁππότε πάτρης
19.169 ἧς ἀπέῃσιν ἀνὴρ τόσσον χρόνον ὅσσον ἐγὼ νῦν ,
19.170 πολλὰ βροτῶν ἐπὶ ἄστεʹ ἀλώμενος , ἄλγεα πάσχων ·
19.171 ἀλλὰ καὶ ὣς ἐρέω ὅ μʹ ἀνείρεαι ἠδὲ μεταλλᾷς .
19.172 Κρήτη τις γαῖʹ ἔστι , μέσῳ ἐνὶ οἴνοπι πόντῳ ,
19.173 καλὴ καὶ πίειρα , περίρρυτος · ἐν δʹ ἄνθρωποι
19.174 πολλοί , ἀπειρέσιοι , καὶ ἐννήκοντα πόληες .