18.287 δέξασθʹ . οὐ γὰρ καλὸν ἀνήνασθαι δόσιν ἐστίν ·
18.288 ἡμεῖς δʹ οὔτʹ ἐπὶ ἔργα πάρος γʹ ἴμεν οὔτε πῃ ἄλλῃ ,
18.289 πρίν γέ σε τῷ γήμασθαι Ἀχαιῶν ὅς τις ἄριστος .
18.290 ὣς ἔφατʹ Ἀντίνοος , τοῖσιν δʹ ἐπιήνδανε μῦθος ·
18.291 δῶρα δʹ ἄρʹ οἰσέμεναι πρόεσαν κήρυκα ἕκαστος .
18.292 Ἀντινόῳ μὲν ἔνεικε μέγαν περικαλλέα πέπλον ,
18.293 ποικίλον · ἐν δʹ ἀρʹ ἔσαν περόναι δυοκαίδεκα πᾶσαι
18.294 χρύσειαι , κληῗσιν ἐϋγνάμπτοις ἀραρυῖαι .
18.295 ὅρμον δʹ Εὐρυμάχῳ πολυδαίδαλον αὐτίκʹ ἔνεικε .
18.296 χρύσεον , ἠλέκτροισιν ἐερμένον ἠέλιον ὥς .
18.297 ἕρματα δʹ Εὐρυδάμαντι δύω θεράποντες ἔνεικαν ,
18.298 τρίγληνα μορόεντα · χάρις δʹ ἀπελάμπετο πολλή .
18.299 ἐκ δʹ ἄρα Πεισάνδροιο Πολυκτορίδαο ἄνακτος
18.300 ἴσθμιον ἤνεικεν θεράπων , περικαλλὲς ἄγαλμα .
18.301 ἄλλο δʹ ἄρʹ ἄλλος δῶρον Ἀχαιῶν καλὸν ἔνεικεν .
18.302 ἡ μὲν ἔπειτʹ ἀνέβαινʹ ὑπερώϊα δῖα γυναικῶν ,
18.303 τῇ δʹ ἄρʹ ἅμʹ ἀμφίπολοι ἔφερον περικαλλέα δῶρα
18.304 οἱ δʹ εἰς ὀρχηστύν τε καὶ ἱμερόεσσαν ἀοιδὴν
18.305 τρεψάμενοι τέρποντο , μένον δʹ ἐπὶ ἕσπερον ἐλθεῖν .
18.306 τοῖσι δὲ τερπομένοισι μέλας ἐπὶ ἕσπερος ἦλθεν .
18.307 αὐτίκα λαμπτῆρας τρεῖς ἵστασαν ἐν μεγάροισιν ,
18.308 ὄφρα φαείνοιεν · περὶ δὲ ξύλα κάγκανα θῆκαν ,
18.309 αὖα πάλαι , περίκηλα , νέον κεκεασμένα χαλκῷ ,
18.310 καὶ δαΐδας μετέμισγον · ἀμοιβηδὶς δʹ ἀνέφαινον
18.311 δμῳαὶ Ὀδυσσῆος ταλασίφρονος . αὐτὰρ ὁ τῇσιν
18.312 αὐτὸς διογενῆς μετέφη πολύμητις Ὀδυσσεύς ·
18.313 δμῳαὶ Ὀδυσσῆος , δὴν οἰχομένοιο ἄνακτος ,
18.314 ἔρχεσθε πρὸς δώμαθʹ , ἵνʹ αἰδοίη βασίλεια ·
18.315 τῇ δὲ παρʹ ἠλάκατα στροφαλίζετε , τέρπετε δʹ αὐτὴν
18.316 ἥμεναι ἐν μεγάρῳ , ἢ εἴρια πείκετε χερσίν ·
18.317 αὐτὰρ ἐγὼ τούτοισι φάος πάντεσσι παρέξω .