18.257 ἦ μὲν δὴ ὅτε τʹ ᾖε λιπὼν κάτα πατρίδα γαῖαν ,
18.258 δεξιτερὴν ἐπὶ καρπῷ ἑλὼν ἐμὲ χεῖρα προσηύδα ·
18.259 ὦ γύναι , οὐ γὰρ ὀΐω ἐϋκνήμιδας Ἀχαιοὺς
18.260 ἐκ Τροίης εὖ πάντας ἀπήμονας ἀπονέεσθαι ·
18.261 καὶ γὰρ Τρῶάς φασι μαχητὰς ἔμμεναι ἄνδρας ,
18.262 ἠμὲν ἀκοντιστὰς ἠδὲ ῥυτῆρας ὀϊστῶν
18.263 ἵππων τʹ ὠκυπόδων ἐπιβήτορας , οἵ κε τάχιστα
18.264 ἔκριναν μέγα νεῖκος ὁμοιΐου πολέμοιο .
18.265 τῷ οὐκ οἶδʹ ἤ κέν μʹ ἀνέσει θεός , ἦ κεν ἁλώω
18.266 αὐτοῦ ἐνὶ Τροίῃ · σοὶ δʹ ἐνθάδε πάντα μελόντων .
18.267 μεμνῆσθαι πατρὸς καὶ μητέρος ἐν μεγάροισιν
18.268 ὡς νῦν , ἢ ἔτι μᾶλλον ἐμεῦ ἀπονόσφιν ἐόντος ·
18.269 αὐτὰρ ἐπὴν δὴ παῖδα γενειήσαντα ἴδηαι ,
18.270 γήμασθʹ ᾧ κʹ ἐθέλῃσθα , τεὸν κατὰ δῶμα λιποῦσα .
18.271 κεῖνος τὼς ἀγόρευε · τὰ δὴ νῦν πάντα τελεῖται .
18.272 νὺξ δʹ ἔσται ὅτε δὴ στυγερὸς γάμος ἀντιβολήσει
18.273 οὐλομένης ἐμέθεν , τῆς τε Ζεὺς ὄλβον ἀπηύρα .
18.274 ἀλλὰ τόδʹ αἰνὸν ἄχος κραδίην καὶ θυμὸν ἱκάνει ·
18.275 μνηστήρων οὐχ ἥδε δίκη τὸ πάροιθε τέτυκτο ·
18.276 οἵ τʹ ἀγαθήν τε γυναῖκα καὶ ἀφνειοῖο θύγατρα
18.277 μνηστεύειν ἐθέλωσι καὶ ἀλλήλοις ἐρίσωσιν ,
18.278 αὐτοὶ τοί γʹ ἀπάγουσι βόας καὶ ἴφια μῆλα ,
18.279 κούρης δαῖτα φίλοισι , καὶ ἀγλαὰ δῶρα διδοῦσιν ·
18.280 ἀλλʹ οὐκ ἀλλότριον βίοτον νήποινον ἔδουσιν .
18.281 ὣς φάτο , γήθησεν δὲ πολύτλας δῖος Ὀδυσσεύς ,
18.282 οὕνεκα τῶν μὲν δῶρα παρέλκετο , θέλγε δὲ θυμὸν
18.283 μειλιχίοις ἐπέεσσι , νόος δέ οἱ ἄλλα μενοίνα .
18.284 τὴν δʹ αὖτʹ Ἀντίνοος προσέφη , Εὐπείθεος υἱός ,
18.285 κούρη Ἰκαρίοιο , περίφρον Πηνελόπεια ,
18.286 δῶρα μὲν ὅς κʹ ἐθέλῃσιν Ἀχαιῶν ἐνθάδʹ ἐνεῖκαι ,