17.576 οὐ σύ γʹ ἄγεις , Εὔμαιε · τί τοῦτʹ ἐνόησεν ἀλήτης ;
17.577 ἦ τινά που δείσας ἐξαίσιον ἦε καὶ ἄλλως
17.578 αἰδεῖται κατὰ δῶμα ; κακὸς δʹ αἰδοῖος ἀλήτης .
17.579 τὴν δʹ ἀπαμειβόμενος προσέφης , Εὔμαιε συβῶτα ·
17.580 μυθεῖται κατὰ μοῖραν , ἅ πέρ κʹ οἴοιτο καὶ ἄλλος ,
17.581 ὕβριν ἀλυσκάζων ἀνδρῶν ὑπερηνορεόντων .
17.582 ἀλλά σε μεῖναι ἄνωγεν ἐς ἠέλιον καταδύντα .
17.583 καὶ δὲ σοὶ ὧδʹ αὐτῇ πολὺ κάλλιον , ὦ βασίλεια ,
17.584 οἴην πρὸς ξεῖνον φάσθαι ἔπος ἠδʹ ἐπακοῦσαι .
17.585 τὸν δʹ αὖτε προσέειπε περίφρων Πηνελόπεια ·
17.586 οὐκ ἄφρων ὁ ξεῖνος · ὀΐεται , ὥς περ ἂν εἴη ·
17.587 οὐ γάρ πού τινες ὧδε καταθνητῶν ἀνθρώπων
17.588 ἀνέρες ὑβρίζοντες ἀτάσθαλα μηχανόωνται .
17.589 ἡ μὲν ἄρʹ ὣς ἀγόρευεν , ὁ δʹ ᾤχετο δῖος ὑφορβὸς
17.590 μνηστήρων ἐς ὅμιλον , ἐπεὶ διεπέφραδε πάντα .
17.591 αἶψα δὲ Τηλέμαχον ἔπεα πτερόεντα προσηύδα ,
17.592 ἄγχι σχὼν κεφαλήν , ἵνα μὴ πευθοίαθʹ οἱ ἄλλοι ·
17.593 ὦ φίλʹ , ἐγὼ μὲν ἄπειμι , σύας καὶ κεῖνα φυλάξων ,
17.594 σὸν καὶ ἐμὸν βίοτον · σοὶ δʹ ἐνθάδε πάντα μελόντων .
17.595 αὐτὸν μέν σε πρῶτα σάω , καὶ φράζεο θυμῷ
17.596 μή τι πάθῃς · πολλοὶ δὲ κακὰ φρονέουσιν Ἀχαιῶν ,
17.597 τοὺς Ζεὺς ἐξολέσειε πρὶν ἡμῖν πῆμα γενέσθαι .
17.598 τὸν δʹ αὖ Τηλέμαχος πεπνυμένος ἀντίον ηὔδα ·
17.599 ἔσσεται οὕτως , ἄττα · σὺ δʹ ἔρχεο δειελιήσας ·
17.600 ἠῶθεν δʹ ἰέναι καὶ ἄγειν ἱερήϊα καλά ·
17.601 αὐτὰρ ἐμοὶ τάδε πάντα καὶ ἀθανάτοισι μελήσει .
17.602 ὣς φάθʹ , ὁ δʹ αὖτις ἄρʹ ἕζετʹ ἐϋξέστου ἐπὶ δίφρου ,
17.603 πλησάμενος δʹ ἄρα θυμὸν ἐδητύος ἠδὲ ποτῆτος