17.521 ὣς ἐμὲ κεῖνος ἔθελγε παρήμενος ἐν μεγάροισι .
17.522 φησὶ δʹ Ὀδυσσῆος ξεῖνος πατρώϊος εἶναι ,
17.523 Κρήτῃ ναιετάων , ὅθι Μίνωος γένος ἐστίν .
17.524 ἔνθεν δὴ νῦν δεῦρο τόδʹ ἵκετο πήματα πάσχων ,
17.525 προπροκυλινδόμενος · στεῦται δʹ Ὀδυσῆος ἀκοῦσαι ,
17.526 ἀγχοῦ , Θεσπρωτῶν ἀνδρῶν ἐν πίονι δήμῳ ,
17.527 ζωοῦ · πολλὰ δʹ ἄγει κειμήλια ὅνδε δόμονδε .
17.528 τὸν δʹ αὖτε προσέειπε περίφρων Πηνελόπεια ·
17.529 ἔρχεο , δεῦρο κάλεσσον , ἵνʹ ἀντίον αὐτὸς ἐνίσπῃ .
17.530 οὗτοι δʹ ἠὲ θύρῃσι καθήμενοι ἑψιαάσθων .
17.531 ἢ αὐτοῦ κατὰ δώματʹ , ἐπεί σφισι θυμὸς ἐΰφρων .
17.532 αὐτῶν μὲν γὰρ κτήματʹ ἀκήρατα κεῖτʹ ἐνὶ οἴκῳ ,
17.533 σῖτος καὶ μέθυ ἡδύ · τὰ μὲν οἰκῆες ἔδουσιν ,
17.534 οἱ δʹ εἰς ἡμέτερον πωλεύμενοι ἤματα πάντα ,
17.535 βοῦς ἱερεύοντες καὶ ὄϊς καὶ πίονας αἶγας ,
17.536 εἰλαπινάζουσιν πίνουσί τε αἴθοπα οἶνον ,
17.537 μαψιδίως · τὰ δὲ πολλὰ κατάνεται . οὐ γὰρ ἔπʹ ἀνήρ ,
17.538 οἷος Ὀδυσσεὺς ἔσκεν , ἀρὴν ἀπὸ οἴκου ἀμῦναι .
17.539 εἰ δʹ Ὀδυσεὺς ἔλθοι καὶ ἵκοιτʹ ἐς πατρίδα γαῖαν ,
17.540 αἶψά κε σὺν ᾧ παιδὶ βίας ἀποτίσεται ἀνδρῶν .
17.541 ὣς φάτο , Τηλέμαχος δὲ μέγʹ ἔπταρεν , ἀμφὶ δὲ δῶμα
17.542 σμερδαλέον κονάβησε · γέλασσε δὲ Πηνελόπεια ,
17.543 αἶψα δʹ ἄρʹ Εὔμαιον ἔπεα πτερόεντα προσηύδα ·
17.544 ἔρχεό μοι , τὸν ξεῖνον ἐναντίον ὧδε κάλεσσον .
17.545 οὐχ ὁράᾳς ὅ μοι υἱὸς ἐπέπταρε πᾶσιν ἔπεσσι ;
17.546 τῷ κε καὶ οὐκ ἀτελὴς θάνατος μνηστῆρσι γένοιτο
17.547 πᾶσι μάλʹ , οὐδέ κέ τις θάνατον καὶ κῆρας ἀλύξει .
17.548 ἄλλο δέ τοι ἐρέω , σὺ δʹ ἐνὶ φρεσὶ βάλλεο σῇσιν ·