15.412 ἔνθα δύω πόλιες , δίχα δέ σφισι πάντα δέδασται ·
15.413 τῇσιν δʹ ἀμφοτέρῃσι πατὴρ ἐμὸς ἐμβασίλευε ,
15.414 Κτήσιος Ὀρμενίδης , ἐπιείκελος ἀθανάτοισιν .
15.415 ἔνθα δὲ Φοίνικες ναυσίκλυτοι ἤλυθον ἄνδρες ,
15.416 τρῶκται , μυρίʹ ἄγοντες ἀθύρματα νηῒ μελαίνῃ .
15.417 ἔσκε δὲ πατρὸς ἐμοῖο γυνὴ Φοίνισσʹ ἐνὶ οἴκῳ ,
15.418 καλή τε μεγάλη τε καὶ ἀγλαὰ ἔργα ἰδυῖα ·
15.419 τὴν δʹ ἄρα Φοίνικες πολυπαίπαλοι ἠπερόπευον .
15.420 πλυνούσῃ τις πρῶτα μίγη κοίλῃ παρὰ νηῒ
15.421 εὐνῇ καὶ φιλότητι , τά τε φρένας ἠπεροπεύει
15.422 θηλυτέρῃσι γυναιξί , καὶ ἥ κʹ εὐεργὸς ἔῃσιν .
15.423 εἰρώτα δὴ ἔπειτα τίς εἴη καὶ πόθεν ἔλθοι ·
15.424 ἡ δὲ μάλʹ αὐτίκα πατρὸς ἐπέφραδεν ὑψερεφὲς δῶ ·
15.425 ἐκ μὲν Σιδῶνος πολυχάλκου εὔχομαι εἶναι ,
15.426 κούρη δʹ εἴμʹ Ἀρύβαντος ἐγὼ ῥυδὸν ἀφνειοῖο ·
15.427 ἀλλά μʹ ἀνήρπαξαν Τάφιοι ληΐστορες ἄνδρες
15.428 ἀγρόθεν ἐρχομένην , πέρασαν δέ τε δεῦρʹ ἀγαγόντες
15.429 τοῦδʹ ἀνδρὸς πρὸς δώμαθʹ · ὁ δʹ ἄξιον ὦνον ἔδωκε .
15.430 τὴν δʹ αὖτε προσέειπεν ἀνήρ , ὃς ἐμίσγετο λάθρη ·
15.431 ἦ ῥά κε νῦν πάλιν αὖτις ἅμʹ ἡμῖν οἴκαδʹ ἕποιο ,
15.432 ὄφρα ἴδῃ πατρὸς καὶ μητέρος ὑψερεφὲς δῶ
15.433 αὐτούς τʹ ; ἦ γὰρ ἔτʹ εἰσὶ καὶ ἀφνειοὶ καλέονται .
15.434 τὸν δʹ αὖτε προσέειπε γυνὴ καὶ ἀμείβετο μύθῳ ·
15.435 εἴη κεν καὶ τοῦτʹ , εἴ μοι ἐθέλοιτέ γε , ναῦται ,
15.436 ὅρκῳ πιστωθῆναι ἀπήμονά μʹ οἴκαδʹ ἀπάξειν .
15.437 ὣς ἔφαθʹ , οἱ δʹ ἄρα πάντες ἐπώμνυον ὡς ἐκέλευεν .
15.438 αὐτὰρ ἐπεί ῥʹ ὄμοσάν τε τελεύτησάν τε τὸν ὅρκον ,
15.439 τοῖς δʹ αὖτις μετέειπε γυνὴ καὶ ἀμείβετο μύθῳ ·
15.440 σιγῇ νῦν , μή τίς με προσαυδάτω ἐπέεσσιν