Greek Reader — The Homeric Odyssey (14.466

14.466 καί τι ἔπος προέηκεν ὅ περ τʹ ἄρρητον ἄμεινον .

14.467 ἀλλʹ ἐπεὶ οὖν τὸ πρῶτον ἀνέκραγον , οὐκ ἐπικεύσω .

14.468 εἴθʹ ὣς ἡβώοιμι βίη τέ μοι ἔμπεδος εἴη ,

14.469 ὡς ὅθʹ ὑπὸ Τροίην λόχον ἤγομεν ἀρτύναντες .

14.470 ἡγείσθην δʹ Ὀδυσεύς τε καὶ Ἀτρεΐδης Μενέλαος ,

14.471 τοῖσι δʹ ἅμα τρίτος ἄρχον ἐγών · αὐτοὶ γὰρ ἄνωγον .

14.472 ἀλλʹ ὅτε δή ῥʹ ἱκόμεσθα ποτὶ πτόλιν αἰπύ τε τεῖχος ,

14.473 ἡμεῖς μὲν περὶ ἄστυ κατὰ ῥωπήϊα πυκνά ,

14.474 ἂν δόνακας καὶ ἕλος , ὑπὸ τεύχεσι πεπτηῶτες

14.475 κείμεθα . νὺξ δʹ ἄρʹ ἐπῆλθε κακὴ Βορέαο πεσόντος ,

14.476 πηγυλίς · αὐτὰρ ὕπερθε χιὼν γένετʹ ἠΰτε πάχνη ,

14.477 ψυχρή , καὶ σακέεσσι περιτρέφετο κρύσταλλος .

14.478 ἔνθʹ ἄλλοι πάντες χλαίνας ἔχον ἠδὲ χιτῶνας ,

14.479 εὗδον δʹ εὔκηλοι , σάκεσιν εἰλυμένοι ὤμους ·

14.480 αὐτὰρ ἐγὼ χλαῖναν μὲν ἰὼν ἑτάροισιν ἔλειπον

14.481 ἀφραδίῃς , ἐπεὶ οὐκ ἐφάμην ῥιγωσέμεν ἔμπης ,

14.482 ἀλλʹ ἑπόμην σάκος οἶον ἔχων καὶ ζῶμα φαεινόν .

14.483 ἀλλʹ ὅτε δὴ τρίχα νυκτὸς ἔην , μετὰ δʹ ἄστρα βεβήκει ,

14.484 καὶ τότʹ ἐγὼν Ὀδυσῆα προσηύδων ἐγγὺς ἐόντα

14.485 ἀγκῶνι νύξας · ὁ δʹ ἄρʹ ἐμμαπέως ὑπάκουσε ·

14.486 διογενὲς Λαερτιάδη , πολυμήχανʹ Ὀδυσσεῦ ,

14.487 οὔ τοι ἔτι ζωοῖσι μετέσσομαι , ἀλλά με χεῖμα

14.488 δάμναται · οὐ γὰρ ἔχω χλαῖναν · παρά μʹ ἤπαφε δαίμων

14.489 οἰοχίτωνʹ ἔμεναι · νῦν δʹ οὐκέτι φυκτὰ πέλονται .

14.490 ὣς ἐφάμην , ὁ δʹ ἔπειτα νόον σχέθε τόνδʹ ἐνὶ θυμῷ ,

14.491 οἷος κεῖνος ἔην βουλευέμεν ἠδὲ μάχεσθαι ·

14.492 φθεγξάμενος δʹ ὀλίγῃ ὀπί με πρὸς μῦθον ἔειπε ·

14.493 σίγα νῦν , μή τίς σευ Ἀχαιῶν ἄλλος ἀκούσῃ .