Greek Reader — The Homeric Odyssey (9.412

9.412 ἀλλὰ σύ γʹ εὔχεο πατρὶ Ποσειδάωνι ἄνακτι .

9.413 ὣς ἄρʹ ἔφαν ἀπιόντες , ἐμὸν δʹ ἐγέλασσε φίλον κῆρ ,

9.414 ὡς ὄνομʹ ἐξαπάτησεν ἐμὸν καὶ μῆτις ἀμύμων .

9.415 Κύκλωψ δὲ στενάχων τε καὶ ὠδίνων ὀδύνῃσι

9.416 χερσὶ ψηλαφόων ἀπὸ μὲν λίθον εἷλε θυράων ,

9.417 αὐτὸς δʹ εἰνὶ θύρῃσι καθέζετο χεῖρε πετάσσας ,

9.418 εἴ τινά που μετʹ ὄεσσι λάβοι στείχοντα θύραζε ·

9.419 οὕτω γάρ πού μʹ ἤλπετʹ ἐνὶ φρεσὶ νήπιον εἶναι .

9.420 αὐτὰρ ἐγὼ βούλευον , ὅπως ὄχʹ ἄριστα γένοιτο ,

9.421 εἴ τινʹ ἑταίροισιν θανάτου λύσιν ἠδʹ ἐμοὶ αὐτῷ

9.422 εὑροίμην · πάντας δὲ δόλους καὶ μῆτιν ὕφαινον

9.423 ὥς τε περὶ ψυχῆς · μέγα γὰρ κακὸν ἐγγύθεν ἦεν .

9.424 ἥδε δέ μοι κατὰ θυμὸν ἀρίστη φαίνετο βουλή .

9.425 ἄρσενες ὄιες ἦσαν ἐυτρεφέες , δασύμαλλοι ,

9.426 καλοί τε μεγάλοι τε , ἰοδνεφὲς εἶρος ἔχοντες ·

9.427 τοὺς ἀκέων συνέεργον ἐυστρεφέεσσι λύγοισιν ,

9.428 τῇς ἔπι Κύκλωψ εὗδε πέλωρ , ἀθεμίστια εἰδώς ,

9.429 σύντρεις αἰνύμενος · ὁ μὲν ἐν μέσῳ ἄνδρα φέρεσκε ,

9.430 τὼ δʹ ἑτέρω ἑκάτερθεν ἴτην σώοντες ἑταίρους .

9.431 τρεῖς δὲ ἕκαστον φῶτʹ ὄιες φέρον · αὐτὰρ ἐγώ γε —

9.432 ἀρνειὸς γὰρ ἔην μήλων ὄχʹ ἄριστος ἁπάντων ,

9.433 τοῦ κατὰ νῶτα λαβών , λασίην ὑπὸ γαστέρʹ ἐλυσθεὶς

9.434 κείμην · αὐτὰρ χερσὶν ἀώτου θεσπεσίοιο

9.435 νωλεμέως στρεφθεὶς ἐχόμην τετληότι θυμῷ .

9.436 ὣς τότε μὲν στενάχοντες ἐμείναμεν Ἠῶ δῖαν .

9.437 ἦμος δʹ ἠριγένεια φάνη ῥοδοδάκτυλος Ἠώς ,

9.438 καὶ τότʹ ἔπειτα νομόνδʹ ἐξέσσυτο ἄρσενα μῆλα ,

9.439 θήλειαι δὲ μέμηκον ἀνήμελκτοι περὶ σηκούς ·

9.440 οὔθατα γὰρ σφαραγεῦντο . ἄναξ δʹ ὀδύνῃσι κακῇσι

9.441 τειρόμενος πάντων ὀίων ἐπεμαίετο νῶτα