6.1 ὣς ὁ μὲν ἔνθα καθεῦδε πολύτλας δῖος Ὀδυσσεὺς
6.2 ὕπνῳ καὶ καμάτῳ ἀρημένος · αὐτὰρ Ἀθήνη
6.3 βῆ ῥʹ ἐς Φαιήκων ἀνδρῶν δῆμόν τε πόλιν τε ,
6.4 οἳ πρὶν μέν ποτʹ ἔναιον ἐν εὐρυχόρῳ Ὑπερείῃ ,
6.5 ἀγχοῦ Κυκλώπων ἀνδρῶν ὑπερηνορεόντων ,
6.6 οἵ σφεας σινέσκοντο , βίηφι δὲ φέρτεροι ἦσαν .
6.7 ἔνθεν ἀναστήσας ἄγε Ναυσίθοος θεοειδής ,
6.8 εἷσεν δὲ Σχερίῃ , ἑκὰς ἀνδρῶν ἀλφηστάων ,
6.9 ἀμφὶ δὲ τεῖχος ἔλασσε πόλει , καὶ ἐδείματο οἴκους ,
6.10 καὶ νηοὺς ποίησε θεῶν , καὶ ἐδάσσατʹ ἀρούρας .
6.11 ἀλλʹ ὁ μὲν ἤδη κηρὶ δαμεὶς Ἄϊδόσδε βεβήκει ,
6.12 Ἀλκίνοος δὲ τότʹ ἦρχε , θεῶν ἄπο μήδεα εἰδώς .
6.13 τοῦ μὲν ἔβη πρὸς δῶμα θεά , γλαυκῶπις Ἀθήνη ,
6.14 νόστον Ὀδυσσῆι μεγαλήτορι μητιόωσα .
6.15 βῆ δʹ ἴμεν ἐς θάλαμον πολυδαίδαλον , ᾧ ἔνι κούρη
6.16 κοιμᾶτʹ ἀθανάτῃσι φυὴν καὶ εἶδος ὁμοίη ,
6.17 Ναυσικάα , θυγάτηρ μεγαλήτορος Ἀλκινόοιο ,
6.18 πὰρ δὲ δύʹ ἀμφίπολοι , Χαρίτων ἄπο κάλλος ἔχουσαι ,
6.19 σταθμοῖιν ἑκάτερθε · θύραι δʹ ἐπέκειντο φαειναί .
6.20 ἡ δʹ ἀνέμου ὡς πνοιὴ ἐπέσσυτο δέμνια κούρης ,
6.21 στῆ δʹ ἄρʹ ὑπὲρ κεφαλῆς , καί μιν πρὸς μῦθον ἔειπεν ,
6.22 εἰδομένη κούρῃ ναυσικλειτοῖο Δύμαντος ,
6.23 ἥ οἱ ὁμηλικίη μὲν ἔην , κεχάριστο δὲ θυμῷ .
6.24 τῇ μιν ἐεισαμένη προσέφη γλαυκῶπις Ἀθήνη ·
6.25 Ναυσικάα , τί νύ σʹ ὧδε μεθήμονα γείνατο μήτηρ ;
6.26 εἵματα μέν τοι κεῖται ἀκηδέα σιγαλόεντα ,
6.27 σοὶ δὲ γάμος σχεδόν ἐστιν , ἵνα χρὴ καλὰ μὲν αὐτὴν
6.28 ἕννυσθαι , τὰ δὲ τοῖσι παρασχεῖν , οἵ κέ σʹ ἄγωνται .
6.29 ἐκ γάρ τοι τούτων φάτις ἀνθρώπους ἀναβαίνει