5.319 τὸν δʹ ἄρʹ ὑπόβρυχα θῆκε πολὺν χρόνον , οὐδʹ ἐδυνάσθη
5.320 αἶψα μάλʹ ἀνσχεθέειν μεγάλου ὑπὸ κύματος ὁρμῆς ·
5.321 εἵματα γάρ ῥʹ ἐβάρυνε , τά οἱ πόρε δῖα Καλυψώ .
5.322 ὀψὲ δὲ δή ῥʹ ἀνέδυ , στόματος δʹ ἐξέπτυσεν ἅλμην
5.323 πικρήν , ἥ οἱ πολλὴ ἀπὸ κρατὸς κελάρυζεν .
5.324 ἀλλʹ οὐδʹ ὣς σχεδίης ἐπελήθετο , τειρόμενός περ ,
5.325 ἀλλὰ μεθορμηθεὶς ἐνὶ κύμασιν ἐλλάβετʹ αὐτῆς ,
5.326 ἐν μέσσῃ δὲ καθῖζε τέλος θανάτου ἀλεείνων .
5.327 τὴν δʹ ἐφόρει μέγα κῦμα κατὰ ῥόον ἔνθα καὶ ἔνθα .
5.328 ὡς δʹ ὅτʹ ὀπωρινὸς Βορέης φορέῃσιν ἀκάνθας
5.329 ἂμ πεδίον , πυκιναὶ δὲ πρὸς ἀλλήλῃσιν ἔχονται ,
5.330 ὣς τὴν ἂμ πέλαγος ἄνεμοι φέρον ἔνθα καὶ ἔνθα ·
5.331 ἄλλοτε μέν τε Νότος Βορέῃ προβάλεσκε φέρεσθαι ,
5.332 ἄλλοτε δʹ αὖτʹ Εὖρος Ζεφύρῳ εἴξασκε διώκειν .
5.333 τὸν δὲ ἴδεν Κάδμου θυγάτηρ , καλλίσφυρος Ἰνώ ,
5.334 Λευκοθέη , ἣ πρὶν μὲν ἔην βροτὸς αὐδήεσσα ,
5.335 νῦν δʹ ἁλὸς ἐν πελάγεσσι θεῶν ἒξ ἔμμορε τιμῆς .
5.336 ἥ ῥʹ Ὀδυσῆʹ ἐλέησεν ἀλώμενον , ἄλγεʹ ἔχοντα ,
5.337 αἰθυίῃ δʹ ἐικυῖα ποτῇ ἀνεδύσετο λίμνης ,
5.338 ἷζε δʹ ἐπὶ σχεδίης πολυδέσμου εἶπέ τε μῦθον ·
5.339 κάμμορε , τίπτε τοι ὧδε Ποσειδάων ἐνοσίχθων
5.340 ὠδύσατʹ ἐκπάγλως , ὅτι τοι κακὰ πολλὰ φυτεύει ;
5.341 οὐ μὲν δή σε καταφθίσει μάλα περ μενεαίνων .
5.342 ἀλλὰ μάλʹ ὧδʹ ἔρξαι , δοκέεις δέ μοι οὐκ ἀπινύσσειν ·
5.343 εἵματα ταῦτʹ ἀποδὺς σχεδίην ἀνέμοισι φέρεσθαι
5.344 κάλλιπʹ , ἀτὰρ χείρεσσι νέων ἐπιμαίεο νόστου
5.345 γαίης Φαιήκων , ὅθι τοι μοῖρʹ ἐστὶν ἀλύξαι .
5.346 τῆ δέ , τόδε κρήδεμνον ὑπὸ στέρνοιο τανύσσαι