4.670 ὄφρα μιν αὐτὸν ἰόντα λοχήσομαι ἠδὲ φυλάξω
4.671 ἐν πορθμῷ Ἰθάκης τε Σάμοιό τε παιπαλοέσσης ,
4.672 ὡς ἂν ἐπισμυγερῶς ναυτίλλεται εἵνεκα πατρός .
4.673 ὣς ἔφαθʹ , οἱ δʹ ἄρα πάντες ἐπῄνεον ἠδʹ ἐκέλευον .
4.674 αὐτίκʹ ἔπειτʹ ἀνστάντες ἔβαν δόμον εἰς Ὀδυσῆος .
4.675 οὐδʹ ἄρα Πηνελόπεια πολὺν χρόνον ἦεν ἄπυστος
4.676 μύθων , οὓς μνηστῆρες ἐνὶ φρεσὶ βυσσοδόμευον ·
4.677 κῆρυξ γάρ οἱ ἔειπε Μέδων , ὃς ἐπεύθετο βουλὰς
4.678 αὐλῆς ἐκτὸς ἐών · οἱ δʹ ἔνδοθι μῆτιν ὕφαινον .
4.679 βῆ δʹ ἴμεν ἀγγελέων διὰ δώματα Πηνελοπείῃ ·
4.680 τὸν δὲ κατʹ οὐδοῦ βάντα προσηύδα Πηνελόπεια ·
4.681 κῆρυξ , τίπτε δέ σε πρόεσαν μνηστῆρες ἀγαυοί ;
4.682 ἦ εἰπέμεναι δμῳῇσιν Ὀδυσσῆος θείοιο
4.683 ἔργων παύσασθαι , σφίσι δʹ αὐτοῖς δαῖτα πένεσθαι ;
4.684 μὴ μνηστεύσαντες μηδʹ ἄλλοθʹ ὁμιλήσαντες
4.685 ὕστατα καὶ πύματα νῦν ἐνθάδε δειπνήσειαν ·
4.686 οἳ θάμʹ ἀγειρόμενοι βίοτον κατακείρετε πολλόν ,
4.687 κτῆσιν Τηλεμάχοιο δαΐφρονος · οὐδέ τι πατρῶν
4.688 ὑμετέρων τὸ πρόσθεν ἀκούετε , παῖδες ἐόντες ,
4.689 οἷος Ὀδυσσεὺς ἔσκε μεθʹ ὑμετέροισι τοκεῦσιν ,
4.690 οὔτε τινὰ ῥέξας ἐξαίσιον οὔτε τι εἰπὼν
4.691 ἐν δήμῳ , ἥ τʹ ἐστὶ δίκη θείων βασιλήων ·
4.692 ἄλλον κʹ ἐχθαίρῃσι βροτῶν , ἄλλον κε φιλοίη .
4.693 κεῖνος δʹ οὔ ποτε πάμπαν ἀτάσθαλον ἄνδρα ἐώργει .
4.694 ἀλλʹ ὁ μὲν ὑμέτερος θυμὸς καὶ ἀεικέα ἔργα
4.695 φαίνεται , οὐδέ τίς ἐστι χάρις μετόπισθʹ ἐυεργέων .
4.696 τὴν δʹ αὖτε προσέειπε Μέδων πεπνυμένα εἰδώς ·
4.697 αἲ γὰρ δή , βασίλεια , τόδε πλεῖστον κακὸν εἴη .
4.698 ἀλλὰ πολὺ μεῖζόν τε καὶ ἀργαλεώτερον ἄλλο
4.699 μνηστῆρες φράζονται , ὃ μὴ τελέσειε Κρονίων ·
4.700 Τηλέμαχον μεμάασι κατακτάμεν ὀξέι χαλκῷ