Greek Reader — The Homeric Odyssey (4.555

4.555 υἱὸς Λαέρτεω , Ἰθάκῃ ἔνι οἰκία ναίων ·

4.556 τὸν δʹ ἴδον ἐν νήσῳ θαλερὸν κατὰ δάκρυ χέοντα ,

4.557 νύμφης ἐν μεγάροισι Καλυψοῦς , ἥ μιν ἀνάγκῃ

4.558 ἴσχει · ὁ δʹ οὐ δύναται ἣν πατρίδα γαῖαν ἱκέσθαι ·

4.559 οὐ γάρ οἱ πάρα νῆες ἐπήρετμοι καὶ ἑταῖροι ,

4.560 οἵ κέν μιν πέμποιεν ἐπʹ εὐρέα νῶτα θαλάσσης .

4.561 σοι δʹ οὐ θέσφατόν ἐστι , διοτρεφὲς ὦ Μενέλαε ,

4.562 Ἄργει ἐν ἱπποβότῳ θανέειν καὶ πότμον ἐπισπεῖν ,

4.563 ἀλλά σʹ ἐς Ἠλύσιον πεδίον καὶ πείρατα γαίης

4.564 ἀθάνατοι πέμψουσιν , ὅθι ξανθὸς Ῥαδάμανθυς ,

4.565 τῇ περ ῥηίστη βιοτὴ πέλει ἀνθρώποισιν ·

4.566 οὐ νιφετός , οὔτʹ ἂρ χειμὼν πολὺς οὔτε ποτʹ ὄμβρος ,

4.567 ἀλλʹ αἰεὶ Ζεφύροιο λιγὺ πνείοντος ἀήτας

4.568 Ὠκεανὸς ἀνίησιν ἀναψύχειν ἀνθρώπους ·

4.569 οὕνεκʹ ἔχεις Ἑλένην καί σφιν γαμβρὸς Διός ἐσσι .

4.570 ὣς εἰπὼν ὑπὸ πόντον ἐδύσετο κυμαίνοντα .

4.571 αὐτὰρ ἐγὼν ἐπὶ νῆας ἅμʹ ἀντιθέοις ἑτάροισιν

4.572 ἤια , πολλὰ δέ μοι κραδίη πόρφυρε κιόντι .

4.573 αὐτὰρ ἐπεί ῥʹ ἐπὶ νῆα κατήλθομεν ἠδὲ θάλασσαν ,

4.574 δόρπον θʹ ὁπλισάμεσθʹ , ἐπί τʹ ἤλυθεν ἀμβροσίη νύξ ,

4.575 δὴ τότε κοιμήθημεν ἐπὶ ῥηγμῖνι θαλάσσης .

4.576 ἦμος δʹ ἠριγένεια φάνη ῥοδοδάκτυλος Ἠώς ,

4.577 νῆας μὲν πάμπρωτον ἐρύσσαμεν εἰς ἅλα δῖαν ,

4.578 ἐν δʹ ἱστοὺς τιθέμεσθα καὶ ἱστία νηυσὶν ἐίσῃς ,

4.579 ἂν δὲ καὶ αὐτοὶ βάντες ἐπὶ κληῖσι καθῖζον ·

4.580 ἑξῆς δʹ ἑζόμενοι πολιὴν ἅλα τύπτον ἐρετμοῖς .

4.581 ἂψ δʹ εἰς Αἰγύπτοιο διιπετέος ποταμοῖο

4.582 στῆσα νέας , καὶ ἔρεξα τεληέσσας ἑκατόμβας .

4.583 αὐτὰρ ἐπεὶ κατέπαυσα θεῶν χόλον αἰὲν ἐόντων ,

4.584 χεῦʹ Ἀγαμέμνονι τύμβον , ἵνʹ ἄσβεστον κλέος εἴη .