Greek Reader — The Homeric Odyssey (4.328

4.328 λίσσομαι , εἴ ποτέ τοί τι πατὴρ ἐμός , ἐσθλὸς Ὀδυσσεὺς

4.329 ἢ ἔπος ἠέ τι ἔργον ὑποστὰς ἐξετέλεσσε

4.330 δήμῳ ἔνι Τρώων , ὅθι πάσχετε πήματʹ Ἀχαιοί ,

4.331 τῶν νῦν μοι μνῆσαι , καί μοι νημερτὲς ἐνίσπες .

4.332 τὸν δὲ μέγʹ ὀχθήσας προσέθη ξανθὸς Μενέλαος ·

4.333 ὢ πόποι , ἦ μάλα δὴ κρατερόφρονος ἀνδρὸς ἐν εὐνῇ

4.334 ἤθελον εὐνηθῆναι ἀνάλκιδες αὐτοὶ ἐόντες .

4.335 ὡς δʹ ὁπότʹ ἐν ξυλόχῳ ἔλαφος κρατεροῖο λέοντος

4.336 νεβροὺς κοιμήσασα νεηγενέας γαλαθηνοὺς

4.337 κνημοὺς ἐξερέῃσι καὶ ἄγκεα ποιήεντα

4.338 βοσκομένη , ὁ δʹ ἔπειτα ἑὴν εἰσήλυθεν εὐνήν ,

4.339 ἀμφοτέροισι δὲ τοῖσιν ἀεικέα πότμον ἐφῆκεν ,

4.340 ὣς Ὀδυσεὺς κείνοισιν ἀεικέα πότμον ἐφήσει .

4.341 αἲ γάρ , Ζεῦ τε πάτερ καὶ Ἀθηναίη καὶ Ἄπολλον ,

4.342 τοῖος ἐών , οἷός ποτʹ ἐυκτιμένῃ ἐνὶ Λέσβῳ

4.343 ἐξ ἔριδος Φιλομηλεΐδῃ ἐπάλαισεν ἀναστάς ,

4.344 κὰδ δʹ ἔβαλε κρατερῶς , κεχάροντο δὲ πάντες Ἀχαιοί ,

4.345 τοῖος ἐὼν μνηστῆρσιν ὁμιλήσειεν Ὀδυσσεύς ·

4.346 πάντες κʹ ὠκύμοροί τε γενοίατο πικρόγαμοί τε .

4.347 ταῦτα δʹ ἅ μʹ εἰρωτᾷς καὶ λίσσεαι , οὐκ ἂν ἐγώ γε

4.348 ἄλλα παρὲξ εἴποιμι παρακλιδόν , οὐδʹ ἀπατήσω ,

4.349 ἀλλὰ τὰ μέν μοι ἔειπε γέρων ἅλιος νημερτής ,

4.350 τῶν οὐδέν τοι ἐγὼ κρύψω ἔπος οὐδʹ ἐπικεύσω .

4.351 Αἰγύπτῳ μʹ ἔτι δεῦρο θεοὶ μεμαῶτα νέεσθαι

4.352 ἔσχον , ἐπεὶ οὔ σφιν ἔρεξα τεληέσσας ἑκατόμβας .

4.353 οἱ δʹ αἰεὶ βούλοντο θεοὶ μεμνῆσθαι ἐφετμέων .

4.354 νῆσος ἔπειτά τις ἔστι πολυκλύστῳ ἐνὶ πόντῳ

4.355 Αἰγύπτου προπάροιθε , Φάρον δέ ἑ κικλήσκουσι ,

4.356 τόσσον ἄνευθʹ ὅσσον τε πανημερίη γλαφυρὴ νηῦς

4.357 ἤνυσεν , ᾗ λιγὺς οὖρος ἐπιπνείῃσιν ὄπισθεν ·