Greek Reader — The Homeric Odyssey (4.1

4.1 οἱ δʹ ἷξον κοίλην Λακεδαίμονα κητώεσσαν ,

4.2 πρὸς δʹ ἄρα δώματʹ ἔλων Μενελάου κυδαλίμοιο .

4.3 τὸν δʹ εὗρον δαινύντα γάμον πολλοῖσιν ἔτῃσιν

4.4 υἱέος ἠδὲ θυγατρὸς ἀμύμονος ᾧ ἐνὶ οἴκῳ .

4.5 τὴν μὲν Ἀχιλλῆος ῥηξήνορος υἱέι πέμπεν ·

4.6 ἐν Τροίῃ γὰρ πρῶτον ὑπέσχετο καὶ κατένευσε

4.7 δωσέμεναι , τοῖσιν δὲ θεοὶ γάμον ἐξετέλειον .

4.8 τὴν ἄρʹ ὅ γʹ ἔνθʹ ἵπποισι καὶ ἅρμασι πέμπε νέεσθαι

4.9 Μυρμιδόνων προτὶ ἄστυ περικλυτόν , οἷσιν ἄνασσεν .

4.10 υἱέι δὲ Σπάρτηθεν Ἀλέκτορος ἤγετο κούρην ,

4.11 ὅς οἱ τηλύγετος γένετο κρατερὸς Μεγαπένθης

4.12 ἐκ δούλης · Ἑλένῃ δὲ θεοὶ γόνον οὐκέτʹ ἔφαινον ,

4.13 ἐπεὶ δὴ τὸ πρῶτον ἐγείνατο παῖδʹ ἐρατεινήν ,

4.14 Ἑρμιόνην , ἣ εἶδος ἔχε χρυσέης Ἀφροδίτης .

4.15 ὣς οἱ μὲν δαίνυντο καθʹ ὑψερεφὲς μέγα δῶμα

4.16 γείτονες ἠδὲ ἔται Μενελάου κυδαλίμοιο ,

4.17 τερπόμενοι · μετὰ δέ σφιν ἐμέλπετο θεῖος ἀοιδὸς

4.18 φορμίζων , δοιὼ δὲ κυβιστητῆρε κατʹ αὐτούς ,

4.19 μολπῆς ἐξάρχοντος , ἐδίνευον κατὰ μέσσους .

4.20 τὼ δʹ αὖτʹ ἐν προθύροισι δόμων αὐτώ τε καὶ ἵππω ,

4.21 Τηλέμαχός θʹ ἥρως καὶ Νέστορος ἀγλαὸς υἱός ,

4.22 στῆσαν · ὁ δὲ προμολὼν ἴδετο κρείων Ἐτεωνεύς ,

4.23 ὀτρηρὸς θεράπων Μενελάου κυδαλίμοιο ,

4.24 βῆ δʹ ἴμεν ἀγγελέων διὰ δώματα ποιμένι λαῶν ,

4.25 ἀγχοῦ δʹ ἱστάμενος ἔπεα πτερόεντα προσηύδα ·

4.26 ξείνω δή τινε τώδε , διοτρεφὲς ὦ Μενέλαε ,

4.27 ἄνδρε δύω , γενεῇ δὲ Διὸς μεγάλοιο ἔικτον .

4.28 ἀλλʹ εἴπʹ , ἤ σφωιν καταλύσομεν ὠκέας ἵππους ,

4.29 ἦ ἄλλον πέμπωμεν ἱκανέμεν , ὅς κε φιλήσῃ .

4.30 τὸν δὲ μέγʹ ὀχθήσας προσέφη ξανθὸς Μενέλαος ·

4.31 οὐ μὲν νήπιος ἦσθα , Βοηθοΐδη Ἐτεωνεῦ ,