Greek Reader — The Homeric Odyssey (3.438

3.438 ἀσκήσας , ἵνʹ ἄγαλμα θεὰ κεχάροιτο ἰδοῦσα .

3.439 βοῦν δʹ ἀγέτην κεράων Στρατίος καὶ δῖος Ἐχέφρων .

3.440 χέρνιβα δέ σφʹ Ἄρητος ἐν ἀνθεμόεντι λέβητι

3.441 ἤλυθεν ἐκ θαλάμοιο φέρων , ἑτέρῃ δʹ ἔχεν οὐλὰς

3.442 ἐν κανέῳ πέλεκυν δὲ μενεπτόλεμος Θρασυμήδης

3.443 ὀξὺν ἔχων ἐν χειρὶ παρίστατο βοῦν ἐπικόψων .

3.444 Περσεὺς δʹ ἀμνίον εἶχε · γέρων δʹ ἱππηλάτα Νέστωρ

3.445 χέρνιβά τʹ οὐλοχύτας τε κατήρχετο , πολλὰ δʹ Ἀθήνῃ

3.446 εὔχετʹ ἀπαρχόμενος , κεφαλῆς τρίχας ἐν πυρὶ βάλλων .

3.447 αὐτὰρ ἐπεί ῥʹ εὔξαντο καὶ οὐλοχύτας προβάλοντο ,

3.448 αὐτίκα Νέστορος υἱὸς ὑπέρθυμος Θρασυμήδης

3.449 ἤλασεν ἄγχι στάς · πέλεκυς δʹ ἀπέκοψε τένοντας

3.450 αὐχενίους , λῦσεν δὲ βοὸς μένος . αἱ δʹ ὀλόλυξαν

3.451 θυγατέρες τε νυοί τε καὶ αἰδοίη παράκοιτις

3.452 Νέστορος , Εὐρυδίκη , πρέσβα Κλυμένοιο θυγατρῶν .

3.453 οἱ μὲν ἔπειτʹ ἀνελόντες ἀπὸ χθονὸς εὐρυοδείης

3.454 ἔσχον · ἀτὰρ σφάξεν Πεισίστρατος , ὄρχαμος ἀνδρῶν .

3.455 τῆς δʹ ἐπεὶ ἐκ μέλαν αἷμα ῥύη , λίπε δʹ ὀστέα θυμός ,

3.456 αἶψʹ ἄρα μιν διέχευαν , ἄφαρ δʹ ἐκ μηρία τάμνον

3.457 πάντα κατὰ μοῖραν , κατά τε κνίσῃ ἐκάλυψαν

3.458 δίπτυχα ποιήσαντες , ἐπʹ αὐτῶν δʹ ὠμοθέτησαν .

3.459 καῖε δʹ ἐπὶ σχίζῃς ὁ γέρων , ἐπὶ δʹ αἴθοπα οἶνον

3.460 λεῖβε · νέοι δὲ παρʹ αὐτὸν ἔχον πεμπώβολα χερσίν .

3.461 αὐτὰρ ἐπεὶ κατὰ μῆρʹ ἐκάη καὶ σπλάγχνα πάσαντο ,

3.462 μίστυλλόν τʹ ἄρα τἆλλα καὶ ἀμφʹ ὀβελοῖσιν ἔπειραν ,

3.463 ὤπτων δʹ ἀκροπόρους ὀβελοὺς ἐν χερσὶν ἔχοντες .

3.464 τόφρα δὲ Τηλέμαχον λοῦσεν καλὴ Πολυκάστη ,

3.465 Νέστορος ὁπλοτάτη θυγάτηρ Νηληϊάδαο .

3.466 αὐτὰρ ἐπεὶ λοῦσέν τε καὶ ἔχρισεν λίπʹ ἐλαίῳ ,