2.314 νῦν δʹ ὅτε δὴ μέγας εἰμὶ καὶ ἄλλων μῦθον ἀκούων
2.315 πυνθάνομαι , καὶ δή μοι ἀέξεται ἔνδοθι θυμός ,
2.316 πειρήσω , ὥς κʹ ὔμμι κακὰς ἐπὶ κῆρας ἰήλω ,
2.317 ἠὲ Πύλονδʹ ἐλθών , ἢ αὐτοῦ τῷδʹ ἐνὶ δήμῳ .
2.318 εἶμι μέν , οὐδʹ ἁλίη ὁδὸς ἔσσεται ἣν ἀγορεύω ,
2.319 ἔμπορος · οὐ γὰρ νηὸς ἐπήβολος οὐδʹ ἐρετάων
2.320 γίγνομαι · ὥς νύ που ὔμμιν ἐείσατο κέρδιον εἶναι .
2.321 ἦ ῥα , καὶ ἐκ χειρὸς χεῖρα σπάσατʹ Ἀντινόοιο
2.322 ῥεῖα · μνηστῆρες δὲ δόμον κάτα δαῖτα πένοντο .
2.323 οἱ δʹ ἐπελώβευον καὶ ἐκερτόμεον ἐπέεσσιν .
2.324 ὧδε δέ τις εἴπεσκε νέων ὑπερηνορεόντων ·
2.325 ἦ μάλα Τηλέμαχος φόνον ἡμῖν μερμηρίζει .
2.326 ἤ τινας ἐκ Πύλου ἄξει ἀμύντορας ἠμαθόεντος
2.327 ἢ ὅ γε καὶ Σπάρτηθεν , ἐπεί νύ περ ἵεται αἰνῶς ·
2.328 ἠὲ καὶ εἰς Ἐφύρην ἐθέλει , πίειραν ἄρουραν ,
2.329 ἐλθεῖν , ὄφρʹ ἔνθεν θυμοφθόρα φάρμακʹ ἐνείκῃ ,
2.330 ἐν δὲ βάλῃ κρητῆρι καὶ ἡμέας πάντας ὀλέσσῃ .
2.331 ἄλλος δʹ αὖτʹ εἴπεσκε νέων ὑπερηνορεόντων ·
2.332 τίς δʹ οἶδʹ , εἴ κε καὶ αὐτὸς ἰὼν κοίλης ἐπὶ νηὸς
2.333 τῆλε φίλων ἀπόληται ἀλώμενος ὥς περ Ὀδυσσεύς ;
2.334 οὕτω κεν καὶ μᾶλλον ὀφέλλειεν πόνον ἄμμιν ·
2.335 κτήματα γάρ κεν πάντα δασαίμεθα , οἰκία δʹ αὖτε
2.336 τούτου μητέρι δοῖμεν ἔχειν ἠδʹ ὅς τις ὀπυίοι .
2.337 ὣς φάν , ὁ δʹ ὑψόροφον θάλαμον κατεβήσετο πατρὸς
2.338 εὐρύν , ὅθι νητὸς χρυσὸς καὶ χαλκὸς ἔκειτο
2.339 ἐσθής τʹ ἐν χηλοῖσιν ἅλις τʹ ἐυῶδες ἔλαιον ·
2.340 ἐν δὲ πίθοι οἴνοιο παλαιοῦ ἡδυπότοιο
2.341 ἕστασαν , ἄκρητον θεῖον ποτὸν ἐντὸς ἔχοντες ,