Greek Reader — The Homeric Iliad (9.515

9.515 εἰ μὲν γὰρ μὴ δῶρα φέροι τὰ δ’ ὄπισθ’ ὀνομάζοι

9.516 Ἀτρεΐδης , ἀλλ’ αἰὲν ἐπιζαφελῶς χαλεπαίνοι ,

9.517 οὐκ ἂν ἔγωγέ σε μῆνιν ἀπορρίψαντα κελοίμην

9.518 Ἀργείοισιν ἀμυνέμεναι χατέουσί περ ἔμπης ·

9.519 νῦν δ’ ἅμα τ’ αὐτίκα πολλὰ διδοῖ τὰ δ’ ὄπισθεν ὑπέστη ,

9.520 ἄνδρας δὲ λίσσεσθαι ἐπιπροέηκεν ἀρίστους

9.521 κρινάμενος κατὰ λαὸν Ἀχαιϊκόν , οἵ τε σοὶ αὐτῷ

9.522 φίλτατοι Ἀργείων · τῶν μὴ σύ γε μῦθον ἐλέγξῃς

9.523 μηδὲ πόδας · πρὶν δ’ οὔ τι νεμεσσητὸν κεχολῶσθαι .

9.524 οὕτω καὶ τῶν πρόσθεν ἐπευθόμεθα κλέα ἀνδρῶν

9.525 ἡρώων , ὅτε κέν τιν’ ἐπιζάφελος χόλος ἵκοι ·

9.526 δωρητοί τε πέλοντο παράρρητοί τ’ ἐπέεσσι .

9.527 μέμνημαι τόδε ἔργον ἐγὼ πάλαι οὔ τι νέον γε

9.528 ὡς ἦν · ἐν δ’ ὑμῖν ἐρέω πάντεσσι φίλοισι .

9.529 Κουρῆτές τ’ ἐμάχοντο καὶ Αἰτωλοὶ μενεχάρμαι

9.530 ἀμφὶ πόλιν Καλυδῶνα καὶ ἀλλήλους ἐνάριζον ,

9.531 Αἰτωλοὶ μὲν ἀμυνόμενοι Καλυδῶνος ἐραννῆς ,

9.532 Κουρῆτες δὲ διαπραθέειν μεμαῶτες Ἄρηϊ .

9.533 καὶ γὰρ τοῖσι κακὸν χρυσόθρονος Ἄρτεμις ὦρσε

9.534 χωσαμένη ὅ οἱ οὔ τι θαλύσια γουνῷ ἀλωῆς

9.535 Οἰνεὺς ῥέξ’ · ἄλλοι δὲ θεοὶ δαίνυνθ’ ἑκατόμβας ,

9.536 οἴῃ δ’ οὐκ ἔρρεξε Διὸς κούρῃ μεγάλοιο .

9.537 ἢ λάθετ’ ἢ οὐκ ἐνόησεν · ἀάσατο δὲ μέγα θυμῷ .

9.538 ἣ δὲ χολωσαμένη δῖον γένος ἰοχέαιρα

9.539 ὦρσεν ἔπι χλούνην σῦν ἄγριον ἀργιόδοντα ,

9.540 ὃς κακὰ πόλλ’ ἕρδεσκεν ἔθων Οἰνῆος ἀλωήν ·

9.541 πολλὰ δ’ ὅ γε προθέλυμνα χαμαὶ βάλε δένδρεα μακρὰ

9.542 αὐτῇσιν ῥίζῃσι καὶ αὐτοῖς ἄνθεσι μήλων .

9.543 τὸν δ’ υἱὸς Οἰνῆος ἀπέκτεινεν Μελέαγρος

9.544 πολλέων ἐκ πολίων θηρήτορας ἄνδρας ἀγείρας

9.545 καὶ κύνας · οὐ μὲν γάρ κε δάμη παύροισι βροτοῖσι ·